O‘zbekiston Respublikasi Prezidenti Shavkat Mirziyoyev bugun, 3-noyabr kuni ikki kunlik amaliy tashrif bilan Buxoro viloyatiga tashrif buyurmoqda. Ushbu safar davomida hududni ijtimoiy-iqtisodiy jihatdan kompleks rivojlantirish, yangi sanoat va infratuzilma loyihalarini hayotga tatbiq etish masalalari muhokama markazida bo‘lishi kutilmoqda.

Davlat rahbari tashrif doirasida qadimiy Buxoroning boy tarixiy merosini asrab-avaylash, shuningdek, mahalliy turizm infratuzilmasini yanada takomillashtirish borasida amalga oshirilayotgan keng ko‘lamli ishlar bilan yaqindan tanishishi rejalashtirilgan. Mutasaddilar bu boradagi mavjud muammolar va kelgusidagi vazifalar yuzasidan hisobot berishadi.

Shuningdek, tashrif dasturidan viloyatda qishloq xo‘jaligi va sanoat tarmoqlarini rivojlantirishga qaratilgan qator istiqbolli loyihalarni ko‘zdan kechirish o‘rin olgan. Prezident yangi ishlab chiqarish quvvatlarini ishga tushirish hamda navbatdagi muhim obyektlar qurilishiga tamal toshini qo‘yish marosimlarida bevosita ishtirok etishi kutilmoqda.

Safar yakunida Buxoro viloyatini har tomonlama rivojlantirish, aholi turmush darajasini oshirish va yangi ish o‘rinlarini yaratish masalalariga bag‘ishlangan maxsus yig‘ilish o‘tkazilishi ko‘zda tutilgan bo‘lib, unda barcha sohalar bo‘yicha aniq ko‘rsatmalar beriladi.

Source: kun.uz