AQShning birinchi xonimi Melaniya Tramp kechki tok-shou boshlovchisi Jimmi Kimmelni “kutayotgan beva” degan hazili uchun keskin tanqid qildi. Bu hazil Oq uy matbuot kotiblari kechki ovqatidan bir necha kun oldin aytilgan bo‘lib, o‘sha tadbirda otishma sodir bo‘lgan edi.

Melaniya Tramp X platformasida Kimmelning so‘zlarini “nafratli va zo‘ravon” deb atadi va ABC telekanalini uning “vahshiy xatti-harakatlari”ga qarshi chora ko‘rishga chaqirdi. “Uning oilam haqidagi monologi hazil emas – bu so‘zlar korroziv va Amerikadagi siyosiy kasallikni chuqurlashtiradi”, dedi u.

Prezident Donald Tramp ham Truth Social’da Kimmelni “zo‘ravonlikka chaqirish”da ayblab, Disney va ABC’dan uni ishdan bo‘shatishni talab qildi. “Bu narsa chegaradan ancha oshib ketgan”, deb yozdi u.

Kimmelning hazili payshanba kuni efirga uzatilgan bo‘lib, unda u Melaniya Trampni “go‘zal va kutayotgan bevaga o‘xshaysiz” deb ta’riflagan. Shanba kuni Vashington Hilton’dagi kechki ovqatda qurollangan shaxs xavfsizlik posti yaqinida otishma ochgan, biroq Tramp va uning rafiqasi zarar ko‘rmagan.

Oq uy matbuot kotibi Karolin Livit ham Kimmelning so‘zlarini “butunlay aqldan ozgan” deb atadi. Gumonlanuvchi 31 yoshli Koul Tomas Allen tadbir joyida qo‘lga olingan va sudga tortilishi kutilmoqda.

Source: www.bbc.com