Toshkent viloyatining Chinoz tumanida Bo‘zsuv kanaliga tushib ketgan 34 yoshli erkakning jasadi 9 kundan so‘ng topilgani haqida “Millar” dasturida xabar berildi. Voqea 21-mart kuni soat taxminan 14:30 atrofida kanal bo‘yida sodir bo‘lgan, marhum do‘stlari bilan dam olish uchun kelgan va shashlik tayyorlab o‘tirgan.

Dastlabki ma’lumotlarga ko‘ra, erkak kanal bo‘yiga tushib qo‘l-yuzini yuvmoqchi bo‘lgan vaqtda suvga tushib ketgan. Guvohlarning aytishicha, oqim uni tezda olib ketgan va qutqarishning iloji bo‘lmagan. Hodisa paytida ishtirokchilar spirtli ichimlik iste’mol qilgani ham ma’lum qilingan.

Voqeadan so‘ng Toshkent viloyati Favqulodda vaziyatlar bosh boshqarmasiga xabar berilib, qutqaruvchilar va g‘avvoslar jalb etilgan holda qidiruv-qutqaruv ishlari boshlangan. Marhum 1991-yilda tug‘ilgan bo‘lib, uning ikki nafar farzandi borligi aytilgan.

29-mart kuni marhumning qarindoshlari jasad topilgani haqida ma’lum qilib, uning suvdan olib chiqilganini bildirgan. Opasining aytishicha, jasad kanal oqimi bo‘ylab oqib ketib, panjaraga ilinib qolgan holda aniqlangan.

Bu voqea Toshkent viloyatida suv havzalarida sodir bo‘layotgan baxtsiz hodisalarni yana bir bor eslatdi. Avvalroq Chirchiq daryosidan 15 yoshli bolaning jasadi topilgan edi, u suvdagi koptogini olmoqchi bo‘lgan va o‘zi ham suvga tushib ketgan.

Source: www.gazeta.uz