Nufuzli Siena International Photo Awards (SIPA) 2026 xalqaro tanlovining «Suvosti hayoti» yoʻnalishida saralangan eng yaxshi ishlar omma eʼtiboriga havola etildi. Ushbu ijodiy musobaqa har yili dunyoning turli burchaklaridan eng isteʼdodli fotograflarni jamlab, tabiat va inson faoliyatining oʻzaro munosabatlarini ochib beruvchi eng taʼsirli kadrlarni aniqlaydi. Mazkur yoʻnalishda gʻoliblik va sovrinli oʻrinlar tabiatning sirli hamda shafqatsiz qonunlarini oʻzida mujassam etgan suratlarga nasib etdi.
Tanlovning mutlaq gʻolibi deb topilgan Nur Takerning «Okeandagi talatoʻp» nomli ishi hakamlar hayʼatida katta taassurot qoldirdi. Gʻolib kadrda shimoliy olushalar baliqchilar tashlab yuborgan ovqat uchun suv ostida shiddat bilan kurashayotgani aks etgan boʻlib, havodan keskin shoʻngʻigan qushlar toʻlqinlar ostida ozuqa talashadi. Ushbu surat insonning baliqchilik faoliyati va dengiz resurslarini oʻzlashtirishi yovvoyi tabiyot hamda hayvonlar xatti-harakatlariga qanday salbiy yoki oʻzgartiruvchi taʼsir koʻrsatishi mumkinligiga jamoatchilik eʼtiborini qaratishi bilan ahamiyatlidir.
Shuningdek, ikkinchi oʻrinni qoʻlga kiritgan Linda Nessning «Akulalar darvozasi» surati ham oʻzining dinamikasi bilan ajralib turadi. Kadr Janubiy Afrikaning Transkey sohillari yaqinida sodir boʻladigan sardinalarning yillik ulkan koʻchishi paytida muhrlangan boʻlib, unda yirtqich akulaning zich baliq toʻdasi orasida oziqlanish jarayoni ochib berilgan. Uchinchi oʻringa loyiq koʻrilgan Lyuk Rumuanning «Mandarinka baliqlarining juftlashish raqsi» esa muallifdan uzoq yillik sabr va oʻta nozik yondashuvni talab qilgani bilan eʼtiborga molik.
Fotograf Lembex boʻgʻozida ikki hafta davomida olib borgan kuzatishlari natijasida ushbu noyob lahzani muhrlashga muvaffaq boʻlgan. Yorqin rangli mandarinka baliqlarining juftlashish marosimi faqat shom paytida sodir boʻlib, ular marjonlar orasidan chiqib qisqa vaqt suv qatlamiga koʻtariladi va darhol yashirinadi. Bundan tashqari, Romen Baratning Antarktika suzish yoʻlaklarini aks ettiruvchi «Yana baliq oviga» hamda Noam Kortlerning Filippinda olingan «Ogʻir yuk» nomli suratlari ham hakamlar tomonidan yuqori baholanib, tabiatning rang-barangligini namoyish etdi.
Source: kun.uz