Nikon kompaniyasi tomonidan an'anaviy tarzda o'tkazilib kelinayotgan mikrofotografiya bo'yicha Nikon Small World tanlovi o'zining navbatdagi g'oliblarini aniqladi. Ushbu nufuzli ijodiy musobaqa bu yil 69 ta davlatdan jami 1803 ta arizani qabul qilib, ulardan 86 tasini hakamlar hay'ati e'tiboriga loyiq deb topdi. Mazkur tanlov oddiy ko'z bilan ilg'ab bo'lmaydigan mikroskopik olamdagi noyob jarayonlarni keng jamoatchilikka namoyish etishni maqsad qilgan.

Tanlovning mutlaq g'olibi deya Germaniyaning Kyoln shahridan bo'lgan yosh tadqiqotchi va fotograf Ole Bilfeldt e'tirof etildi. U purkagichli printer qog'ozga siyoh tomizayotgan onni mikroskop ostida nihoyatda aniqlik bilan muhrlashga muvaffaq bo'ldi. Muallif o'z oldiga qo'yilgan maqsadga erishish uchun maxsus suratga olish moslamasini o'zi yasagan bo'lib, uning 'Macrofying' deb nomlangan loyihasi kundalik hayotdagi oddiy buyumlarni butunlay o'zgacha rakursda ko'rsatishga qaratilgan.

Ikkinchi faxrli o'rinni Jon-Oliver Dann egallagan bo'lib, uning ishida tanasiga gul changlari to'liq yopishib qolgan sakrovchi o'rgimchak - Salticus scenicus tasvirlangan. Shuningdek, kuchli uchlikka Kaelin Vulf va Reychel Flanneri tomonidan tayyorlangan sichqon miyasidagi neyronlar aks etgan murakkab ilmiy-fotografik asar yakun yasadi. Hakamlar hay'ati e'tirof etgan boshqa ishlar qatorida turli hasharotlar, o'simlik hujayralari va elektr razryadi ostidagi qalam grifelining o'ziga xos holatlari ham o'rin oldi.

Source: kun.uz