«Remembering Wildlife» («Yovvoyi tabiatni yodda saqlab») deb nomlangan mashhur fotokitoblar turkumining navbatdagi nashri butunlay jirafalarga bagʻishlandi. Mazkur loyiha dunyoning yetakchi tabiat fotograflarini birlashtirib, ushbu ulugʻvor hayvonlar duch kelayotgan jiddiy tahdidlarga eʼtibor qaratish va muhofaza tadbirlari uchun mablagʻ yigʻishni maqsad qilgani aytilmoqda.

Yangi kitob sahifalaridan Jonatan va Anjela Skott, Marsel van Osten, Frans Lanting, Greg dyu Tua kabi taniqli ijodkorlarning sara ishlari oʻrin olgan. Fotomateriallarda sayyoramizdagi eng baland sutemizuvchilarning tabiat qoʻynidagi kundalik hayoti, ularning oʻziga xos xatti-harakatlari va yovvoyi muhitdagi goʻzalligi aks ettirilgan.

Shunga qaramay, mazkur nashr mualliflari jirafalar global miqyosda duch kelayotgan achinarli va xavfli tendentsiyalarga alohida urgʻu berishgan. Olingan maʼlumotlarga koʻra, soʻnggi uch yuz yil ichida jirafalar oʻzlarining tabiiy yashash muhitining qariyb 90 foizini yoʻqotib qoʻygan. Qolaversa, Afrikaning kamida yetti mamlakatida bu jonivorlar butunlay qirilib ketgani taxmin qilinmoqda.

Xalqaro tabiatni muhofaza qilish ittifoqi statistikasiga koʻra, 1985-yildan buyon jirafalar populyatsiyasi keskin qisqargan boʻlib, ayrim mintaqalarda bu koʻrsatkich 40 foizni tashkil etmoqda. Ayrim qoʻriqlanadigan hududlarda sayyohlar ularni Afrika landshaftining ajralmas qismi sifatida koʻrgani bilan, koʻplab joylarda kichik va izolyatsiya qilingan guruhlar oʻta zaif holatda hayot kechirmoqda.

Qishloq xoʻjaligi yerlarining kengayishi, yangi yoʻllar va toʻsiqlar qurilishi hamda aholi punktlarining jadal oʻsishi jirafalarning anʼanaviy migratsiya yoʻlaklarini uzib qoʻymoqda. Buning ustiga, ayrim hududlarda brakonerlik, qurolli mojarolar va siyosiy beqarorlik tabiatni muhofaza qilish borasidagi harakatlarni yanada qiyinlashtirib, vaziyatni yanada ogʻirlashtirmoqda.

Source: kun.uz