O‘zbekiston ijtimoiy tarmoqlarida Eron osmonida kislotali bulutlar paydo bo‘lib, ular Markaziy Osiyo mamlakatlariga tarqalib, kislotali yomg‘irga sabab bo‘lishi haqida xabarlar tarqalmoqda. Bu xabarlar aholi orasida tashvish va muhokamalarni keltirib chiqardi, ammo rasmiy manbalar buni tezda rad etdi.

O‘zbekiston Ekologiya milliy qo‘mitasi rasmiy bayonotida bu xabarlar ilmiy jihatdan asoslanmagan deb e’lon qildi. Qo‘mita tushuntirishicha, kislotali yog‘ingarchilik atmosferada oltingugurt oksidlari va azot oksidlarining uzoq vaqt to‘planishi natijasida hosil bo‘ladi, ular bulutlardagi suv bug‘lari bilan kimyoviy reaksiyaga kirishadi. Bu jarayonlar asosan sanoat zonalari va to‘g‘ridan-to‘g‘ri ifloslantiruvchi moddalar chiqadigan hududlarga xosdir.

Mutaxassislarga ko‘ra, havoning uzoq masofalarga tashilishi jarayonida ifloslantiruvchi moddalar konsentratsiyasi atmosfera turbulentligi, vertikal aralashish hamda quruq va ho‘l cho‘kma tufayli keskin pasayadi. Shuning uchun manbadan minglab kilometr uzoqlikda xavfli kislotali yog‘ingarchilik konsentratsiyalarini hosil qilish deyarli imkonsizdir. Bundan tashqari, yog‘ingarchilikning yuzaga kelishi mahalliy bulut hosil bo‘lish jarayonlari bilan belgilanadi va yomg‘ir mintaqaning yuqorisidagi atmosferada mavjud bo‘lgan suv bug‘lari hamda ayerozollardan hosil bo‘ladi.

Ekologiya milliy qo‘mitasi meteorologik kuzatuvlar va havo sifati monitoringiga asoslanib, kislotali bulutlarning O‘zbekiston va qo‘shni davlatlar hududiga o‘tish xavfi yo‘qligini ta’kidladi. Idora aholini asossiz xabarlarga ishonmaslikka va faqat rasmiy manbalarga tayanishga chaqirdi.

Source: www.gazeta.uz