Shimoliy Koreya rahbari Kim Chen Ir va Rossiya mudofaa vaziri Andrey Belousov Pyongyangda Ukraina urushida qatnashib halok bo‘lgan shimoliy koreyalik askarlar xotirasiga bag‘ishlangan yodgorlik va muzeyni tantanali ravishda ochdi. Marosim davomida harbiy samolyotlar parvoz qildi va oq sharlar osmonga uchirildi.

Janubiy Koreya razvedkasi maʼlumotlariga ko‘ra, Rossiyaga yordam berish uchun kamida 15 000 nafar shimoliy koreyalik askar yuborilgan bo‘lib, ularning taxminan 2 000 nafari Ukrainadagi janglarda halok bo‘lgan. Rasmiy Pyongyang va Moskva bu raqamlarni tasdiqlamagan.

Evaziga Shimoliy Koreya Rossiyadan oziq-ovqat, pul va texnik yordam olgani taxmin qilinmoqda. Muzeyning ochilishi Rossiyaning Kursk viloyatini qayta nazoratga olishining bir yilligiga to‘g‘ri keldi. Ukraina 2024-yil avgustida Kurskka kutilmagan hujum uyushtirgan, Rossiya esa bir yil o‘tib hududni to‘liq nazoratga olganini eʼlon qilgan.

Kim Chen Ir Belousovga Shimoliy Koreya Rossiyaning suvereniteti, hududiy yaxlitligi va xavfsizlik manfaatlarini himoya qilish siyosatini to‘liq qo‘llab-quvvatlashda davom etishini taʼkidladi. U Rossiya “adolatli muqaddas urushda” albatta g‘alaba qozonishiga ishonch bildirdi.

Belousov rossiyalik jurnalistlarga bergan intervyusida Shimoliy Koreya rasmiylari bilan uzoq muddatli harbiy hamkorlik masalalarini muhokama qilganini aytdi. Kim, shuningdek, Rossiya parlamenti spikeri Vyacheslav Volodin bilan ham uchrashdi.

2024-yil iyun oyida Putin va Kim Chen Ir ikki davlat o‘rtasida “tajovuz” yuz berganda bir-biriga yordam berish to‘g‘risida shartnoma imzolagan edi. Kim bu shartnomani “eng kuchli” deb atagan. Bundan tashqari, Shimoliy Koreya Kurskni tiklashga yordam berish uchun minglab ishchilarni yuborishga vaʼda bergan.

Source: www.bbc.com