Jahon Meteorologiya Tashkiloti (WMO) va Yevropa O‘rta Muddatli Ob-havo Bashoratlari Markazi (ECMWF) hamkorligida tayyorlangan hisobotga ko‘ra, 2025-yilda Yevropaning deyarli barcha hududlarida yillik o‘rtacha harorat me’yordan yuqori bo‘lgan.

Hisobotda qayd etilishicha, Yevropa eng tez isiydigan qitʼa bo‘lib, uning oqibatlari allaqachon jiddiy tus olgan. ECMWF bosh direktori Florian Pappenbergerning so‘zlariga ko‘ra, 2025-yil may oyida qurg‘oqchilik holatlari kuzatilgan.

Issiq va quruq ob-havo sharoiti o‘tgan yili butun qitʼa bo‘ylab yong‘inlarni kuchaytirgan. Yong‘inlar natijasida 1 million gektardan ortiq yer (taxminan Kipr oroli kattaligida) yonib ketgan. Yevropa daryolarining 70 foizida yillik suv oqimi me’yordan past bo‘lgan.

Dengizdagi kuchli issiqlik to‘lqinlari Atlantika okeanining Buyuk Britaniya, Irlandiya va Islandiya yaqinidagi suvlarida, shuningdek, O‘rta yer dengizining bir qancha nuqtalarida qayd etilgan.

Eng keskin o‘zgarishlar Yevropaning eng sovuq mintaqalarida kuzatilgan. Sub-Arktikadagi Norvegiya, Shvetsiya va Finlyandiyada 2025-yil iyul oyida 21 kunlik eng uzoq davom etgan issiqlik to‘lqini qayd etilgan. Bu davrda Arktika doirasida harorat 30 daraja Selsiy va undan yuqoriga ko‘tarilgan.

2025-yil mart oyida Yevropadagi qor qoplami deyarli 30 foizga kamayib, 1,32 million kvadrat kilometrni tashkil etgan. Bu Fransiya, Italiya, Germaniya, Shveytsariya va Avstriya hududlarining umumiy maydoniga teng.

Muzliklarning erishi butun Yevropada qayd etilgan bo‘lib, Islandiyada ikkinchi eng katta muzlik yo‘qotilishi kuzatilgan. ECMWFning iqlim bo‘yicha strategik rahbari Samanta Burgessning ta’kidlashicha, bu hisobot iqlim o‘zgarishi tezligi shoshilinch choralar talab qilayotganini ko‘rsatadi.

Source: www.aljazeera.com