Qozog'iston hukumati 16 yoshgacha bo'lgan bolalar uchun ijtimoiy tarmoqlarda ro'yxatdan o'tishni cheklashni ko'rib chiqmoqda. Tegishli norma hukumatda muhokama qilinayotgan o'zgartirishlar to'plamiga kiritilgan.

Madaniyat va axborot vaziri o'rinbosari Yevgeniy Kochetovning so'zlariga ko'ra, hozircha bolalar uchun internetni to'liq taqiqlash haqida gap yo'q. "Gap bolalarni ro'yxatdan o'tkazishni cheklovchi norma haqida ketmoqda. Mexanizmlar hali kelishilmagan", dedi u.

Qozog'iston bu borada yolg'iz emas. Bolalar uchun ijtimoiy tarmoqlarni cheklash asta-sekin global trendga aylanmoqda. Masalan, Avstraliyada o'tgan yilning dekabridan boshlab yirik platformalar 16 yoshgacha bo'lgan foydalanuvchilarning akkaunt yaratishiga yo'l qo'ymaslik choralarini ko'rishi shart. Bunday platformalar ro'yxatiga Instagram, TikTok, YouTube va boshqa mashhur xizmatlar kiradi.

Yevropada ham bu mavzu yuqori darajaga chiqdi. Yevroparlament yaqinda o'smirlar uchun ijtimoiy tarmoqlar va video platformalarga kirish uchun minimal yoshni 13 dan 16 gacha belgilashni va faqat ota-onalarning roziligi bilan kirishni taklif qildi.

Eslatib o'tamiz, o'tgan yili O'zbekistonda Bolalar kontenti rivojlanishi markazi tashkil etilgan. U bolalarning tarbiyasi va sog'lig'iga salbiy ta'sir ko'rsatishi mumkin bo'lgan materiallarni tahlil qiladi, shuningdek, mahalliy rassomlar bilan kontent yaratishga yordam beradi.

Source: podrobno.uz