Qozog‘istonning Mang‘istau viloyatida Kaspiy dengizi sohilida bo‘lib o‘tgan harbiy-dengiz mashg‘ulotlari paytida halok bo‘lgan harbiy xizmatchilarning oilalariga jami 2,3 milliard tengedan ortiq (taxminan 5,2 million dollar) moliyaviy yordam ajratiladi. Mablag‘lar "Әділет" partiyasi a’zolari va Qozog‘iston xalq kengashi tomonidan taqdim etiladi.

"Әділет" partiyasi va uning Ishbilarmonlar kengashi halok bo‘lgan va jabrlangan harbiy xizmatchilar oilalarini qo‘llab-quvvatlash uchun 1,5 milliard tenge (3,3 million dollar) yo‘naltiradi. Pul yordam yig‘ish bo‘yicha yagona operator etib belgilangan "Ұлттық рух" jamg‘armasiga o‘tkaziladi. To‘lovlar ixtiyoriy asosda amalga oshiriladi.

Qozog‘iston xalq kengashi a’zolari halok bo‘lganlar oilalariga yordam berish uchun qo‘shimcha 815 million tenge (1,8 million dollar) yig‘dilar. Bu mablag‘lar to‘g‘ridan-to‘g‘ri harbiy xizmatchilarning qarindoshlariga topshiriladi.

Ma’lumot uchun, fojia 24-sentabr kuni Qozog‘iston Harbiy-dengiz kuchlarining Kaspiy dengizi sohilidagi mashg‘ulotlari paytida sodir bo‘ldi. O‘quv-jang vazifasini bajarish chog‘ida ob-havo keskin yomonlashdi va shamol kuchaydi, natijada 17 harbiy xizmatchi ochiq dengizda qolib ketdi. Uchtasini qutqarishga muvaffaq bo‘lindi, 14 nafari halok bo‘ldi. Qidiruv-qutqaruv operatsiyasi 25-sentabr kuni oxirgi ikki bedarak yo‘qolgan harbiy xizmatchining jasadlari topilgach yakunlandi.

Harbiy xizmatchilarning halok bo‘lishi faktiga ko‘ra, xizmatga beparvolik bilan munosabatda bo‘lish og‘ir oqibatlarga olib kelganligi va kema boshqarish qoidalarini buzish moddalari bo‘yicha jinoyat ishi qo‘zg‘atildi. Voqea sabablari va holatlarini hukumat komissiyasi aniqlashtirmoqda.

Fojia munosabati bilan 25-sentabr kuni Qozog‘istonda umummilliy motam kuni e’lon qilindi.

Mang‘istau viloyati hokimligi avvalroq yordam ko‘rsatishni istaganlarni mablag‘larni faqat rasmiy "Ұлттық рух" jamg‘armasi orqali o‘tkazishga chaqirgan edi. Mablag‘lar harakati davlat va huquqni muhofaza qilish organlari nazoratida.

Source: podrobno.uz