Qozog'istonda mamlakat Harbiy-dengiz kuchlarining sobiq bosh qo'mondoni Qanat Niyazbekov hibsga olingani haqida xabarlar tarqaldi. Ushbu jiddiy choralar Kaspiy dengizida o'tkazilgan o'quv mashg'ulotlari chog'ida harbiy xizmatchilarning fojiali halokati yuzasidan olib borilayotgan tergov harakatlari doirasida amalga oshirildi.

Respublikasi Ichki ishlar vazirligi ma'lumotlariga ko'ra, sobiq qo'mondon xizmatga nisbatan loqaydlik va mas'uliyatsizlikda gumon qilinib, vaqtincha saqlash hibsxonasiga joylashtirilgan. Keyinchalik sud tomonidan unga nisbatan qamoqqa olish tarzidagi ehtiyot chorasi sanksiyalashtirilgan bo'lib, hozirgi kunda tergovoldi surishtiruv ishlari davom ettirilmoqda.

Eslatib o'tamiz, mazkur mudhish fojia 24 sentyabr kuni o'quv-jangovar vazifani bajarish vaqtida yuzaga kelgan edi. Ob-havoning keskin yomonlashishi va kuchli shamol tufayli Kaspiy dengiziga 17 nafar harbiy xizmatchi oqizib ketilgan. Ularning orasida Qoraqalpog'iston Respublikasida tug'ilgan bir nafar fuqaro ham bo'lib, jami 14 kishi halok bo'lgan, uch nafar askarni esa qutqarib qolishga muvaffaq bo'lingandi.

Shuningdek, yaqinda ushbu fojiali voqeadan omon qolgan uchala harbiy xizmatchi o'zlarining muddatli harbiy xizmatini yakunlab, ota-onasi bag'riga qaytgani ma'lum bo'ldi. Ijtimoiy tarmoqlarda askarlarning yaqinlari bilan uchrashuviga bag'ishlangan ta'sirli videolar keng tarqaldi.

Source: podrobno.uz