Rossiya Federatsiyasida 2026-yil 3-noyabrdan boshlab chet el fuqarolarini mamlakatdan chiqarib yuborish bo'yicha yangi qoidalar kuchga kirdi. Endilikda xorijliklarni nafaqat migratsiya qoidalarini buzgani uchun, balki mayda bezorilik, noqonuniy mitinglarda qatnashish va boshqa huquqbuzarliklar uchun ham deportatsiya qilishlari mumkinligi ma'lum qilindi. Mutaxassislar qayd etishicha, chiqarib yuborish uchun asoslar soni avvalgi 22 tadan 45 taga yetkazilgan bo'lib, bu migratsiya siyosatining sezilarli darajada qattiqlashganidan dalolat beradi.
Xususan, xorijiy fuqarolarga mayda bezorilik, taqiqlangan ramzlarni namoyish etish, Rossiya hududiy yaxlitligini buzishga chaqiriqlar, istalmagan tashkilotlar faoliyatida qatnashish hamda Rossiya Qurolli Kuchlarini obro'sizlantirish kabi qoidabuzarliklar uchun ham chiqarib yuborish xavfi tug'iladi. Shuningdek, ommaviy tadbirlarni o'tkazish qoidalarini buzish, Rossiyaga qarshi sanksiyalar joriy etishga chaqirish, politsiya xodimining qonuniy talablariga bo'ysunmaslik, davlat chegarasini buzish, kamsitish va OAV erkinligidan suiiste'mol qilish ham ushbu ro'yxatga kiritilgan.
Ma'muriy tartibda chiqarib yuborish to'g'risidagi qaror sud tomonidan qabul qilinib, ishni ko'rib chiqishda huquqbuzarlikning barcha holatlari hisobga olinishi aytilmoqda. Qaror chiqarilgach, xorijiy shaxs Rossiya hududini tark etishi shart, bunda vaziyatga qarab chiqib ketish nazorat ostida ixtiyoriy yoki majburiy ravishda amalga oshirilishi belgilanib qo'yilgan. Terrorizm va ekstremizmga chaqiriqlar bilan bog'liq ayrim og'ir qoidabuzarliklar uchun esa faqat majburiy tartibda chiqarib yuborish nazarda tutilgan.
Rossiya Ichki ishlar vazirligi vakillari Rossiya fuqarosi bo'lgan farzandlari bor chet elliklar masalasiga ham to'xtalib o'tishdi. Ularning ta'kidlashicha, yangi qonunda bunday holatlar uchun maxsus istisnolar ko'zda tutilmagan, garchi har bir holat alohida ko'rib chiqilsa-da, Rossiya fuqaroligiga ega bolalarning mavjudligi deportatsiyadan ozod qilinishiga kafolat bermaydi. Shuningdek, migratsiya qoidalarini buzganlik uchun ma'muriy jarimalar miqdori ham oshgani, jumladan, kirish va bo'lish qoidalarini buzganlik hamda noqonuniy mehnat faoliyati uchun jarimalar sezilarli darajada qimmatlashgani qayd etildi.
Source: podrobno.uz