Ozarbayjon Tashqi ishlar vaziri Jeyhun Bayramov Boku shahrida Moldovaning Tashqi ishlar vaziri Mixay Popshoy bilan birgalikda o‘tkazilgan matbuot anjumanida mamlakat Erondagi diplomatik vakolatxonalarini evakuatsiya qilishga qaror qilganini e'lon qildi.

Vazirning so‘zlariga ko‘ra, bu qarorga Ozarbayjon Prezidenti Ilhom Aliyev tomonidan berilgan ko‘rsatma asos bo‘lgan. Ushbu qaror doirasida Ozarbayjonning Tehron shahridagi elchixonasi va Tabriz shahridagi bosh konsulligi evakuatsiya qilinadi.

Bayramov ta'kidladiki, prezident dron hujumidan keyin zarur ko‘rsatmalar bergan, shundan so‘ng diplomatik choralar ko‘rilgan. U Ozarbayjonning xavfsizlik choralari har doim yuqori darajada saqlanayotganini ta'kidladi.

Vazir qo‘shimcha qilib, xavflarning oshishi va yaqin atrofda harbiy harakatlar olib borilayotgan sharoitda qurolli kuchlarning jangovar tayyorgarlik darajasi oshirilganligini, shu sababli tegishli buyruqlar berilganligini aytdi.

Bayramovning so‘zlariga ko‘ra, Boku shuningdek, Eron tomonidan hodisa bo‘yicha tergov natijalarini kutmoqda. "Eronning va'dasiga muvofiq, biz tergov natijalarini kutamiz va shunga asoslanib qarorlar qabul qilinadi va tegishli choralar ko‘riladi", dedi vazir.

Source: kun.uz