AQSh prezidenti Donald Tramp seshanba kuni jurnalistlarga bergan intervyusida Qo‘shma Shtatlar Eronga qarshi boshlagan harbiy kampaniyani ikki-uch hafta ichida yakunlashi mumkinligini aytdi. Reuters va CNN agentliklarining xabar berishicha, Tramp bu jarayonda Tehron bilan kelishuv tuzish shart emasligini ta’kidlagan. Uning so‘zlariga ko‘ra, AQSh tez orada operatsiyani to‘xtatib, mintaqadan chiqib ketadi, chunki ularning buning uchun sababi qolmagan.
Tramp Eron bilan muvaffaqiyatli diplomatik kelishuv operatsiyani yakunlash uchun zaruriy shartmi degan savolga rad javobini berdi. U: “Eron bitim tuzishi shart emas, yo‘q. Yo‘q, ular men bilan bitim tuzishlari shart emas”, deb aytdi. Biroq, u kelishuv imkoniyatini butunlay istisno qilmagan holda, Tehronning bunday kelishuvni ko‘proq istashi mumkinligini ta’kidladi. Trampning fikricha, AQShning maqsadi – Eronning yadro quroliga ega bo‘lmasligiga erishish bo‘lib, bu maqsadga allaqachon erishilgan.
AQSh rahbari, shuningdek, Hurmuz bo‘g‘ozi masalasini boshqa davlatlar hal qilishi kerakligini aytdi. Uning ta’kidlashicha, agar Fransiya yoki boshqa mamlakatlar neft yoki gaz olmoqchi bo‘lsa, ular bo‘g‘oz orqali o‘tishi va o‘z xavflarini o‘zlari boshqarishi kerak. Tramp: “Bizning bunga aloqamiz yo‘q. Bo‘g‘ozda nima sodir bo‘layotgani bilan ishimiz yo‘q – biz bunga aralashmoqchi emasmiz”, dedi.
AQSh va Isroil 28-fevralda Eronga zarbalar berishni boshlaganidan keyin Tehron darhol Hurmuz bo‘g‘ozini to‘sib qo‘ydi, bu jahon neftining 15-20 foizi va suyultirilgan gazning 30 foizdan ortig‘i o‘tadigan yo‘lni yopdi. Bu esa neft narxining keskin oshishiga olib keldi, bu esa amerikaliklar budjetiga zarba berib, noyabr oyidagi Kongress saylovlari arafasida Tramp va Respublikachilar partiyasi uchun siyosiy muammolarni keltirib chiqarmoqda.
Eron tashqi ishlar vaziri Abbos Arakchi Al Jazeera telekanaliga bergan intervyusida Tehronning “kamida olti oy davomida” jang qilishga tayyorligini bildirdi. U: “Biz o‘z-o‘zini himoya qilish uchun hech qanday muddat belgilamaymiz. Biz mamlakatimiz va xalqimizni qancha kerak bo‘lsa va qanday vositalar kerak bo‘lsa, shuncha himoya qilamiz”, dedi. Arakchi, shuningdek, Trampning Tehron AQSh talablarining “ko‘piga” rozi bo‘lgani haqidagi bayonotlarini rad etdi va Eronning 15 banddan iborat rejaga javob bermaganini aytdi.
Source: www.gazeta.uz