AQSh Milliy aeronavtika va koinotni tadqiq qilish boshqarmasi (NASA) 'Artemida II' missiyasi doirasida 'Orion' kosmik kemasining translunar orbitaga o'tgani va Oy tomon yo'l olganini e'lon qildi. Bu 1972-yildagi 'Apollon-17' missiyasidan beri birinchi marta insonlar Yer orbitasini qayta tark etish holati bo'lib, NASAning Oyga qaytish dasturining muhim bosqichi hisoblanadi.

2-aprel kuni AQSh Sharqiy sohil vaqti bilan soat 19:49 da 'Orion' dvigatellari 'translunar in'eksiya impulsi'ni amalga oshirdi, bu jarayon 5 daqiqa 55 soniya davom etdi va kemani Yer atrofidagi orbitadan Oy trayektoriyasiga o'tkazdi. NASA rahbari Jared Ayzekman o'zining X sahifasida bu voqeani e'lon qilib, 'Artemida II' missiyasi ekipajining rasman Oy sari yo'l olganini ta'kidladi.

Ekipaj tarkibida NASA astronavtlari Rid Uayzman, Viktor Glover, Kristina Kox va Kanada kosmik agentligi astronavti Jeremi Xansen bor. Ularning asosiy vazifasi uzoq koinot sharoitida 'Orion' kemasining boshqaruv tizimlarini sinovdan o'tkazishdan iborat, Oy yuzasiga qo'nish rejalashtirilmagan. Parvoz davomida 'Orion' Oy atrofida bir marta aylanib chiqadi, 5-aprel kuni Oyning gravitatsiya ta'siri doirasiga kirishi kutilmoqda.

6-aprel kuni astronavtlar Oyning orqa tomonini aylanib o'tib, Oy yuzasini suratga oladi va videoga tushiradi, shuningdek, o'z kuzatuvlarini qayd etadi. Startdan 10 kun o'tib, kema Yerga qaytishi rejalashtirilgan. Missiya komandiri Rid Uayzman videokonferensiyada ekipajning eng yorqin taassuroti Yerning koinotdan ko'rinishi ekanligini aytdi, bu lahza ularni hayratda qoldirgan.

Source: www.gazeta.uz