Nigeriyaning Adamava shtatidagi Guyaku qishlog‘ida qurolli shaxslar tomonidan uyushtirilgan hujumda kamida 29 kishi halok bo‘ldi. Hujum bir necha soat davom etgan va ko‘plab mulklar vayron qilingan.

Shtat gubernatori Ahmadu Umaru Fintiri ijtimoiy tarmoqdagi sahifasida “Guyaku aholisi uchun yuragim eziladi”, deb yozdi. U dushanba kuni jabrlanganlar bilan uchrashib, “bugun birodarlarimiz shafqatsizlarcha o‘ldirilgan joyda turibman. Bu qo‘rqoqlik insoniylikka zarba bo‘lib, jazosiz qolmaydi”, dedi.

Fintiri ma’muriyati harbiy va qo‘riqchi guruhlarni qo‘llab-quvvatlashni davom ettirishini va xavfsizlik choralarini kuchaytirishini ta’kidladi.

IShIDning mintaqaviy bo‘limi Telegram’dagi post orqali hujum uchun javobgarlikni o‘z zimmasiga oldi. Nigeriyada IShID bilan bog‘liq ikkita yirik qurolli guruh faoliyat yuritadi, ammo aynan qaysi biri hujumni amalga oshirgani noma’lum.

Xuddi shu kuni Nigeriyaning markaziy-shimoliy qismidagi bolalar uyiga qurolli hujum uyushtirilib, 23 nafar bola o‘g‘irlab ketildi. Ulardan 15 nafari keyinroq qutqarildi, qolganlarni topish uchun “intensiv operatsiyalar” olib borilmoqda.

AQSh prezidenti Donald Tramp va boshqa konservativ ovozlar Nigeriya hukumatini fuqarolarni “xristian genotsidi”dan himoya qilmaslikda ayblagan. Nigeriya hukumati esa barcha din vakillari hujumlardan jabr ko‘rganini, jumladan musulmonlar va an’anaviy dinlarga e’tiqod qiluvchilarni ham qurbonlar orasida borligini ta’kidlagan.

AQSh kuzatuv guruhi ACLED ma’lumotlariga ko‘ra, 2025-yil yanvar-noyabr oylarida Nigeriyada tinch aholiga qarshi 1923 hujum qayd etilgan, shundan faqat 50 tasi diniy sabablarga ko‘ra xristianlarga qaratilgan. AQSh dekabr oyida IShID bilan bog‘liq jangarilarga havo hujumlari uyushtirgan va fevralda shimoliy Nigeriyaga 100 nafar askar yuborgan.

Source: www.aljazeera.com