Birlashgan Millatlar Tashkilotining yangi hisobotiga ko‘ra, Janubiy Sudanda 7,8 million kishi (aholining 56 foizi) yaqin oylarda o‘tkir oziq-ovqat taqchilligiga duch keladi. Bu mamlakatdagi mojaro va ko‘chishlar gumanitar inqirozni yanada chuqurlashtirgan.

Oziq-ovqat va qishloq xo‘jaligi tashkiloti, Butunjahon oziq-ovqat dasturi va UNICEF xalqaro hamjamiyatni “qaytarib bo‘lmaydigan gumanitar falokat”ning oldini olish uchun shoshilinch choralar ko‘rishga chaqirdi.

Hisobotda 6 oydan 5 yoshgacha bo‘lgan bolalar orasida o‘tkir to‘yib ovqatlanmaslikdan aziyat chekayotganlar soni so‘nggi olti oyda 100 mingga oshib, 2,2 millionga yetgani qayd etilgan. Ulardan 700 ming bola o‘lim xavfi ostida.

Janubiy Sudandagi ko‘plab ovqatlanish xizmatlari davom etayotgan janglar tufayli zarar ko‘rgan yoki yopilgan, bu esa o‘tkir to‘yib ovqatlanmaslik xavfini oshirgan. Shu bilan birga, ta’minot tanqisligi va moliyalashtirishning yetarli emasligi hayotiy davolanish imkoniyatlarini cheklagan.

Dunyodagi eng yosh davlat bo‘lgan Janubiy Sudandagi gumanitar inqiroz etnik mojaro, iqlim o‘zgarishi va qo‘shni Sudandagi urushning ta’siri bilan kuchaymoqda. Mamlakat iqtisodiy inqirozi vaziyatni yanada og‘irlashtirgan.

So‘nggi oylarda mamlakatda to‘liq fuqarolar urushiga qaytish xavfi kuchaygan. 2018-yildagi tinchlik kelishuviga qaramay, hukumat kuchlari va muxolifat guruhlari o‘rtasidagi to‘qnashuvlar kuchaygan. Bu Prezident Salva Kiir va vitse-prezident Riek Machar o‘rtasidagi uzoq davom etgan nizodan kelib chiqqan.

Source: www.aljazeera.com