Neft narxi dunyo bozorlarida keskin ko‘tarilib, so‘nggi haftalardagi eng yuqori darajaga yetdi. AQShning WTI nefti 6,95 foizga oshib, barrel uchun 106,88 dollarni tashkil etdi, Brent esa 6,08 foizga ko‘tarilib, 118,03 dollarga yetdi. Bu o‘sish, asosan, Hormuz bo‘g‘ozidagi uzluksiz ta'minot uzilishi va AQSh-Isroilning Eronga qarshi urushi davom etayotgani bilan bog‘liq.

Hormuz bo‘g‘ozida Eron kuchlari kemalar tranzitiga blokada o‘rnatgan, AQSh esa Eron portlari va kemalarini qamal qilmoqda. Oq uy rasmiysining ma'lum qilishicha, AQSh prezidenti Donald Tramp neft kompaniyalari rahbarlari bilan uchrashib, Eron portlarini bir necha oy davomida qamalda ushlab turish va amerikalik iste'molchilarga ta'sirni kamaytirish yo‘llarini muhokama qilgan.

Pentagon birinchi marta Eronga qarshi urush AQSh harbiylariga 25 milliard dollarga tushganini ma'lum qildi. IG market tahlilchisi Toni Saykamorning ta'kidlashicha, “Eron mojarosi yoki Hormuz bo‘g‘ozining qayta ochilishi bo‘yicha yaqin kelajakda hech qanday yechim ko‘rinmayapti”.

Al Jazira muxbiri Barnabi Loning xabar berishicha, butun Osiyo-Tinch okeani mintaqasi neft importiga qaram bo‘lib, ko‘pchilik yetkazib berishlar Yaqin Sharqdan amalga oshiriladi. Brent neftining 120 dollarga yetishi mintaqada katta ta'sir ko‘rsatmoqda. Osiyo taraqqiyot banki mintaqa uchun o‘sish prognozini 5,1 foizdan 4,7 foizga tushirgan.

Prezident Tramp Birlashgan Arab Amirliklarining (BAA) OPECdan chiqishini olqishlab, “bu benzin narxini tushirish uchun yaxshi narsa”, dedi. BAA 1 maydan OPEC va OPEC+ ittifoqini tark etishini e'lon qildi. Mutaxassislarning fikricha, BAAning chiqishi bozorga darhol ta'sir ko‘rsatmaydi, chunki uning eksporti hozirda Eronning Hormuz bo‘g‘ozini nazorat qilishi bilan cheklangan.

Source: www.aljazeera.com