Tayvan Prezidenti Lay Chin-te 26-aprel kuni Afrikadagi yagona diplomatik ittifoqchisi Esvatiniyaga yetib keldi. U ijtimoiy tarmoqlarda bu tashrifni "doʻstlikni mustahkamlash" deb atadi va Tayvan hech qachon tashqi bosimga boʻysunmasligini taʼkidladi.

Dastlab 22-26 aprel kunlariga rejalashtirilgan safar Seyshel, Mavrikiy va Madagaskar hukumatlari Layning oʻz havo hududidan oʻtishiga ruxsat bermagani sababli kechiktirildi. Tayvan rasmiylari bu qaror Xitoy bosimi tufayli qabul qilinganini daʼvo qilmoqda.

Pekin esa iqtisodiy bosim oʻtkazganlikni rad etdi, biroq uch davlatning harakatlarini "yuqori baholashini" bildirdi. Xitoy Tashqi ishlar vazirligi matbuot kotibi Layning tashrifini "kulgili nayrang" va "yoʻqotishga mahkum ish" deb atadi.

Lay Chin-te Esvatiniya bilan iqtisodiy, qishloq xoʻjaligi, madaniy va taʼlim sohalarida hamkorlikni kengaytirishga umid qilmoqda. Hozirda Tayvanni tan olgan davlatlar soni 12 taga kamaygan, ular asosan Lotin Amerikasi va Karib havzasida joylashgan.

Source: www.dw.com