Ruminiyada navbatdagi hukumat inqirozi yuz berdi. Ilie Bolojan boshchiligidagi Milliy Liberal partiya (PNL) hukumati parlamentda ishonchsizlik votumi orqali ag‘darildi. Bolojan atigi 10 oy hokimiyatda bo‘ldi.

Bu safargi inqiroz o‘ziga xos: postkommunistik Ruminiya tarixida ilk bor demokratik, yevropaparast lagerdagi partiya — Ijtimoiy Demokratik partiya (PSD) — o‘ta o‘ng, rossiyaparast AUR partiyasi bilan birlashib, hukumatga qarshi ishonchsizlik votumini kiritdi va uni qo‘llab-quvvatladi.

Bu holat o‘ta o‘ngga qarshi “o‘t o‘chirish devori” deb atalgan kelishuvning qulashini anglatadi. PSD bu talqinni rad etsa-da, demokratik partiyalar o‘rtasida o‘tgan yili kelishilgan bu to‘siq endi yo‘q.

Bolojan hukumati 2025-yil iyunida og‘ir iqtisodiy inqiroz sharoitida tuzilgan edi. Byudjet taqchilligi 9% dan oshgan, iqtisodiy o‘sish pasaygan, davlat apparati haddan tashqari katta edi. Hukumat soliqlarni oshirish, davlat xarajatlarini qisqartirish va pensiya islohotini boshladi.

Eng munozarali islohot — sudyalar uchun maxsus pensiya tizimini bekor qilish edi. Ilgari sudyalar 50 yoshdan oldin nafaqaga chiqib, o‘rtacha 5000 yevro pensiya olishlari mumkin edi. Hukumat bu imtiyozlarni bosqichma-bosqich bekor qildi.

PSD dastlab hukumat tarkibida bo‘lsa-da, keyinchalik islohotlarga qarshi chiqdi. Bolojan ishonchsizlik votumini “nohaq, kinik va sun’iy” deb atadi va PSDni “hukumat ichida muxolifat rolini o‘ynaganlikda” aybladi.

Prezident Nikushor Dan erta saylovlarni rad etib, Ruminiya yana g‘arbparast hukumatga ega bo‘lishiga ishonch bildirdi. Biroq, siyosiy tahlilchilar o‘ta o‘ngning hokimiyatga yaqinlashayotganidan xavotirda.

Source: www.dw.com