AQSh Moliya vazirlagi Iroq neft vaziri o‘rinbosari Ali Maarij al-Bahadliy va Eronga yaqin qurolli guruhlar rahbarlariga sanksiya joriy qilganini e’lon qildi. Vashington ularni Eronning neft sotishiga yordam berishda ayblamoqda.

AQSh Moliya vaziri Skott Bessent bayonotida: “Eron hukumati xuddi qaroqchilar to‘dasi kabi Iroq xalqiga tegishli resurslarni talon-taroj qilmoqda. G‘aznachilik Eronga harbiylarining Iroq neftidan AQSh va ittifoqchilariga qarshi terrorizmni moliyalashtirish uchun foydalanishiga yo‘l qo‘ymaydi”, dedi.

Sanksiyalar, shuningdek, AQSh va Eron o‘rtasida Fors ko‘rfazidagi neft eksporti uchun muhim bo‘lgan Hormuz bo‘g‘ozini nazorat qilish borasidagi kurash avj olgan bir paytda kiritildi.

Iroq so‘nggi oylarda AQSh tomonidan Eronga juda yaqinligi sababli bosim ostida. Prezident Donald Tramp avvalroq Vashington Iroqqa yordamni to‘xtatishi mumkinligi haqida ogohlantirgan edi.

Sanksiyalanganlar orasida eng taniqli shaxs – Ali Maarij al-Bahadliy bo‘lib, u yillar davomida Iroq neft boshqaruvini nazorat qilgan. AQSh Moliya vazirligi uning “Iroq neft mahsulotlarini Eronga aloqador kontrabandachiga yo‘naltirishda muhim rol o‘ynaganini” da’vo qilmoqda.

Shuningdek, Eron tarafdori Asa’ib Ahl al-Haq harakatining “rahbari va iqtisodiy amaldori” Mustafo Hoshim Lazim al-Bahadiliy, hamda Kata’ib Sayyid al-Shuhada guruhining yuqori lavozimli xodimlari Ahmad Xudayr Maksus Maksus va Muhammad Issa Kozim al-Shuvayliy ham sanksiyaga uchradi.

Ekspertlarning fikricha, Eron neft kontrabanda tarmog‘idan yiliga kamida 1 milliard dollar daromad oladi. Bu tarmoq Eron yoqilg‘isini Iroq asfalt zavodlariga yo‘naltirib, keyin uni Iroq nefti bilan aralashtirib, sof Iroq mahsuloti sifatida eksport qiladi.

Iroq va Eron yaqin ittifoqchilar bo‘lib, ayniqsa Bag‘dodni boshqarayotgan Eronparast muvofiqlashtiruvchi blok davrida. Ko‘plab Iroq rahbarlari, ayniqsa 2003 yilgacha, Eronda yashagan.

Source: www.aljazeera.com