Janubiy Afrika Respublikasining konstitutsiyaviy sudi prezident Kiril Ramafosaga qarshi impichment jarayonini qayta tiklashga yo‘l ochdi. Sud, 2022 yilda parlamentning mustaqil tergovni bloklash qarorini konstitutsiyaga zid deb topdi.

2022 yilda Ramafosa hukumati, uning fermasida katta miqdordagi naqd pul o‘g‘irlanishi bilan bog‘liq “Farmgate” janjali bo‘yicha tergov o‘tkazish tavsiyasini rad etgan edi. Hukmron Afrika Milliy Kongressi (ANC) partiyasi parlamentdagi ko‘pchilik ovozidan foydalanib, mustaqil komissiya xulosasini bekor qilgan.

Konstitutsiyaviy sud raisi Mandisa Mayaning so‘zlariga ko‘ra, 2022 yil 13 dekabrdagi ovoz berish konstitutsiyaga zid va haqiqiy emas. Sud mustaqil komissiya hisobotini impichment qo‘mitasiga topshirishni buyurdi.

Ishni olib chiqqan muxolifatdagi Iqtisodiy Erkinlik Jangi (EFF) va Afrika Transformatsiya Harakati (ATM) partiyalari Ramafosani iste’foga chaqirmoqda. Prezident 2018 yildan beri hokimiyatda.

Ramafosa ayblovlarni rad etib, pulni fermasidagi bufalolarni sotishdan olganini ta’kidlaydi. Impichment qo‘mitasi bir necha oy davomida dalillarni o‘rganib, rasmiy jarayonni boshlash yoki yo‘qligini hal qiladi.

Agar impichment tavsiya etilsa ham, prezidentni lavozimidan chetlashtirish uchun parlament quyi palatasida uchdan ikki qism ovoz kerak. ANC 2024 yilgi saylovlarda ko‘pchilikni yo‘qotgan bo‘lsa-da, hali ham uchdan bir qism o‘ringa ega.

2022 yil iyun oyida sobiq davlat xavfsizlik xizmati rahbari Artur Freyzer Ramafosani o‘g‘irlikni yashirishda ayblagan edi. Taxminan 4 million dollar o‘g‘irlangan, ammo prezident bu miqdor 580 ming dollar ekanini aytadi.

Prezident devoni sud qarorini hurmat qilishini va hech kim qonundan ustun emasligini bildirdi. Impichment qo‘mitasi qarori bir necha oydan keyin kutilmoqda.

Source: www.aljazeera.com