Suriya sud tizimi Atef Najibni 2011-yilgi norozilik namoyishlarini bostirishda “urush jinoyatlari” darajasidagi harakatlarda aybladi. Bashar Asadning amakivachchasi bo‘lgan Najib o‘sha paytda Daraa viloyatida siyosiy xavfsizlik boshlig‘i edi.

Yakshanba kuni Damashqda bo‘lib o‘tgan sud majlisida sudya Faxr ad-Din al-Aryan ayblovlarni o‘qib eshittirdi. Unga ko‘ra, Najib tinch aholiga qarshi qotillik, qiynoq va o‘zboshimchalik bilan hibsga olish kabi tizimli harakatlar uchun bevosita va birgalikdagi rahbarlik javobgarligiga ega.

Sudya, shuningdek, bolalarni hibsga olish va qiynoqqa solish, Daraadagi masjidda o‘tkazilgan o‘tirish namoyishiga qarata o‘t ochish kabi jinoyatlarni sanab o‘tdi. Najibning xavfsizlik kuchlari tomonidan boshqariladigan hibsxonalarda o‘limga olib kelgan qiynoqlar ham ayblov ro‘yxatiga kiritilgan.

Atef Najib Suriyadagi sobiq rejim amaldorlaridan birinchi bo‘lib sudda shaxsan ishtirok etmoqda. Sobiq prezident Bashar Asad, uning ukasi Maher va boshqa yuqori martabali amaldorlar sirtdan sudlanmoqda. Ular 2024-yil dekabrida hukumat qulaganidan keyin Rossiyaga qochib ketgan deb taxmin qilinmoqda.

2011-yilgi Daraadagi noroziliklar Suriyada 13 yildan ortiq davom etgan fuqarolar urushiga sabab bo‘ldi. 2024-yil oxirida Hay’at Tahrir ash-Sham (HTS) guruhining tezkor hujumi natijasida Asad rejimi quladi va hozirda Ahmad ash-Shara’ vaqtinchalik prezident sifatida faoliyat yuritmoqda.

Ash-Shara’ sobiq rejim a’zolariga qarshi sud jarayonlarini tezlashtirish uchun bosim ostida qolgan. Suriya besh yil ichida prezidentlik saylovlarini o‘tkazishni rejalashtirmoqda.

Source: www.dw.com