Yevropa Ittifoqi Kengashi Suriya bilan hamkorlik to‘g‘risidagi bitimning qisman to‘xtatilishini bekor qildi va mamlakat bilan savdo aloqalarini tiklash yo‘lini ochdi. Bu qaror Suriyaning 14 yillik urushdan chiqishiga yordam berish maqsadida qabul qilindi.
Kengashning ma'lum qilishicha, bu qadam Yevropa Ittifoqi va Suriya o‘rtasidagi munosabatlarni mustahkamlash yo‘lidagi muhim bosqichdir. Qaror “Yevropa Ittifoqining Suriya bilan qayta aloqa o‘rnatish va uning iqtisodiy tiklanishini qo‘llab-quvvatlash majburiyatining aniq siyosiy signali” sifatida baholandi.
Shu bilan birga, Yevropa Ittifoqi tashqi ishlar vazirlari Bryusselda Suriya tashqi ishlar vaziri Asaad ash-Shayboniy bilan uchrashib, yuqori darajadagi siyosiy muloqotni boshladi. Bu uchrashuv Suriyaning sobiq rahbari Bashar al-Assad hokimiyatdan chetlashtirilganidan 18 oy o‘tib bo‘lib o‘tdi.
27 davlatdan iborat blok Suriya bilan yangi sahifani ochdi. Yevropa Komissiyasi rahbari Ursula fon der Leyen yanvar oyida Damashqda Suriya muvaqqat prezidenti Ahmad ash-Sharaa bilan uchrashgandan so‘ng, Yevropa Suriyaning tiklanishi uchun “qo‘lidan kelgan hamma narsani” qilishiga va’da bergan edi.
Komissiya o‘tgan oy Yevropa Ittifoqi davlatlariga Suriya bilan hamkorlik shartnomasini to‘liq faollashtirishni taklif qilgan edi. 2011-yilda Assad hukumatining fuqarolar urushi boshlanishidagi namoyishchilarga qarshi kuch ishlatishi sababli qisman to‘xtatilgan ushbu shartnoma Suriyadan ko‘plab sanoat mahsulotlari importiga bojlarni bekor qilgan edi.
Suriya-Yevropa Ittifoqi savdosi 2010-yilda 7 milliard yevrodan oshgan bo‘lsa, 2023-yilga kelib Yevropa Ittifoqining Suriyadan importi 103 million yevroga, eksporti esa 265 million yevroga tushib ketdi.
Suriyalik qochqinlarning qaytishi masalasida Germaniya eng oldingi safda turibdi. Kansler Fridrix Merts o‘tgan oy Suriya prezidentining tashrifi chog‘ida 80 foiz suriyalik qochqin uch yil ichida vataniga qaytishiga umid qilishini aytib, munozaraga sabab bo‘ldi. Keyinroq u bu raqamni ash-Sharaaning o‘zi aytganini ma’lum qildi.
Source: www.aljazeera.com