Podrobno.uz xabariga ko‘ra, Chad harbiy havo kuchlari Chad ko‘li hududida amalga oshirgan aviazarbalar natijasida o‘nlab nigeriyalik baliqchilar halok bo‘lishi mumkin.

Chad ko‘li havzasi baliqchilik assotsiatsiyasi raisi Abubakar Gamanadi Usmanning so‘zlariga ko‘ra, uyushmaning 40 dan ortiq a’zosi bedarak yo‘qolgan. Halok bo‘lganlarning jasadlari hali topilmagan, biroq taxminlarga ko‘ra, bir qism odamlar to‘g‘ridan-to‘g‘ri o‘qqa tutilishda halok bo‘lgan, qolganlari esa haddan tashqari yuklangan qayiqlarda qochishga urinib cho‘kib ketgan.

Chadning harbiy operatsiyasi o‘tgan haftada kamida 24 askar va ikki generalning o‘limiga sabab bo‘lgan Boko Haram jangarilarining hujumlariga javob bo‘ldi. Chad prezidenti matbuot xizmati terrorchilarning tayanch punktlariga intensiv havo hujumlari o‘tkazilganini tasdiqladi. Biroq muammo shundaki, jangarilar tinch baliqchilar ham yashaydigan orollarda joylashgan. Qidiruv ishlari ko‘lning katta chuqurligi va Boko Haram mintaqadagi suv transporti vositalarining katta qismini nazorat qilishi sababli murakkablashgan.

Nigeriyadagi fojiali voqealar faqat jangovar hudud bilan cheklanmadi. Mamlakat shimoli-g‘arbidagi Zamfara shtatida qurollangan jangarilar magistralda pistirma uyushtirib, kamida 30 kishini o‘ldirdi. Hujum 10 may kuni kechasi sodir bo‘ldi. Mahalliy aholi tomonidan banditlar deb ataladigan qurollangan shaxslar guruhi yo‘ldan o‘tayotgan odamlarga hujum qildi. Halok bo‘lganlar orasida tinch fuqarolar, ovchilar va jamoat xavfsizligi xodimi bor.

Source: podrobno.uz