Janubiy Afrika Respublikasi parlamenti prezident Kiril Ramafosani “Farmgate” mojarosida ayblovlarni tekshirish uchun impichment qo‘mitasini tuzishga qaror qildi.

Parlament quyi palatasi dushanba kuni spiker ushbu organni tashkil etishini ma’lum qildi. Bu qaror mamlakat Oliy sudining o‘tgan haftadagi buyrug‘iga asosan qabul qilindi, sud Ramafosaga qarshi impichment jarayonini qayta tiklagan edi.

Konstitutsiyaviy sud juma kuni parlamentning to‘rt yil avval mojaroni tekshirishni bloklash qarori konstitutsiyaga zid deb topdi. Impichment qo‘mitasi prezidentga tegishli fermadagi divanda yashirilgan katta miqdordagi xorijiy valyuta bilan bog‘liq mojaro bo‘yicha dalillarni ko‘rib chiqadi.

Mojaroning markazida 2020-yilda Ramafosaning Phala Phala ov fermasida divanga tiqilgan 4 million AQSh dollari miqdoridagi naqd pulning o‘g‘irlanishi turadi. Prezident korrupsiyaga qarshi kurash va’dasi bilan hokimiyatga kelgan bo‘lsa-da, pulni qanday qo‘lga kiritgani, uni deklaratsiya qilgani va nima uchun bankda emas, balki mebelda yashirgani haqida savollar tug‘ilgan.

Ramafosa ayblovlarni rad etib, o‘tgan hafta sud qarorini hurmat qilishini bildirdi. Biroq, dushanba kuni kechqurun xalqqa murojaatida u iste’foga chiqmasligini va mustaqil komissiya hisobotiga qarshi sudga murojaat qilishini aytdi.

Ramafosaning Afrika Milliy Kongressi partiyasi seshanba kuni Favqulodda Milliy Ijroiya Qo‘mitasi yig‘ilishini chaqirgan. Iqtisodiy Erkinlik Jangehilari va Afrika Transformatsiya Harakati kabi muxolifat partiyalari prezidentni iste’foga chaqirmoqda. Biroq, impichment qo‘mitasining xulosasi salbiy bo‘lsa ham, prezidentni lavozimidan chetlashtirish uchun quyi palatada uchdan ikki ko‘pchilik ovoz talab etiladi va ANC hali ham yetarli o‘ringa ega.

Source: www.aljazeera.com