Tinch okeanidagi kichik orol davlati Nauru o‘zining rasmiy nomini o‘zgartirish bo‘yicha referendum o‘tkazishga qaror qildi. Parlament konstitutsiyaviy o‘zgartirishni ma’qulladi, endi bu masala umumxalq ovoziga qo‘yiladi.

Prezident Devid Adeang yanvar oyida mamlakat nomini “Naoero” deb o‘zgartirish taklifini kiritgan edi. Hukumatning ta’kidlashicha, “Nauru” nomi mustamlakachilik davrida xorijiy tillar ta’sirida buzib talaffuz qilingan.

Nauruning mahalliy tili “Dorerin Naoero” deb ataladi va 10 mingga yaqin aholining ko‘pchiligi bu tilda gaplashadi. Hukumat nomni o‘zgartirish orqali milliy meros, til va o‘zlikni hurmat qilishni maqsad qilgan.

Nauru dunyodagi eng kichik orol respublikasi bo‘lib, maydoni atigi 20 kvadrat kilometrni tashkil etadi. 1880-yillarning oxiridan Birinchi jahon urushigacha Germaniya protektorati bo‘lgan, keyin Avstraliya qo‘shinlari tomonidan bosib olingan.

Mustaqillikka erishgandan so‘ng, fosfat konlari iqtisodiy yuksalishga sabab bo‘lgan, ammo zaxiralar tugaganidan keyin orolning markazi yaroqsiz holga kelgan.

Source: www.dw.com