Afrika kasalliklarni nazorat qilish va oldini olish markazi (Africa CDC) Kongo Demokratik Respublikasining sharqiy qismida yangi Ebola epidemiyasi boshlanganini tasdiqladi.

Juma kuni e'lon qilingan ma'lumotga ko'ra, Ituri provinsiyasida 65 kishi vafot etgan va 246 ta gumon qilinadigan holat qayd etilgan. Kasallik asosan Mongwalu va Rwampara sog'liqni saqlash zonalarida tarqalgan.

Africa CDC Kongo, Uganda, Janubiy Sudan va xalqaro hamkorlar bilan favqulodda yig'ilish o'tkazib, transchegaraviy kuzatuv va tayyorgarlik choralarini kuchaytirishni rejalashtirmoqda.

Tashkilotning qayd etishicha, Bunia va Rwamparaning shahar sharoiti, aholining zichligi va Mongwalu konchilik hududlaridagi harakatchanlik virusning yanada tarqalish xavfini oshiradi.

Ebola virusi yuqumli bo'lib, qon va boshqa tana suyuqliklari orqali yuqadi. Kasallik isitma, qusish, tana og'rig'i va diareya kabi alomatlar bilan kechadi va ko'pincha o'limga olib keladi.

Bu Kongodagi 17-chi Ebola epidemiyasi. Oldingi epidemiya besh oy oldin yakunlangan bo'lib, 43 kishining hayotiga zomin bo'lgan edi.

Kongo ikkinchi eng katta Afrika davlati bo'lib, chekka hududlarda yo'llar kamligi sababli epidemiyaga qarshi kurash qiyinlashmoqda. Shu bilan birga, mamlakat sharqida M23 va Ittifoqchi Demokratik Kuchlar kabi qurolli guruhlar faoliyat yuritmoqda.

2018-2020 yillardagi eng halokatli Ebola epidemiyasi 2000 dan ortiq odamni o'ldirgan edi.

Source: www.dw.com