Albaniyaning qo‘riqlanadigan Narta lagunasi hududida AQSh prezidenti Donald Trampning kuyovi Jared Kushner bilan bog‘liq yirik turizm loyihasi keng ko‘lamli norozilik va ekologik muammolarni yuzaga keltirmoqda. Bu mamlakat Yevropa Ittifoqiga a’zo bo‘lish yo‘lida muhim bosqichda turgan bir paytda yuz bermoqda.

May oyining oxirida faollar qurilish maydonchasiga kirishga uringanida, ularni xususiy qo‘riqchilar va to‘siqlar kutib oldi. Ijtimoiy tarmoqlarda tarqalgan videolarda namoyishchilarning majburan olib ketilayotgani aks etgan, bu esa jamoatchilik noroziligiga sabab bo‘ldi. Keyingi kunlarda Tirana shahrida “Albaniya sotilmaydi” shiori ostida minglab odamlar norozilik namoyishlariga chiqdi.

Loyiha qiymati 4 milliard yevrodan oshishi va 10 mingdan ortiq ish o‘rni yaratishi kutilmoqda. Bosh vazir Edi Rama buni strategik sarmoya deb atab, Albaniyani global turizm yetakchilaridan biriga aylantirishni maqsad qilgan. Biroq ekologlar bu loyiha noyob ekotizimga, jumladan, ko‘chmanchi qushlar va pushti flamingolar yashash muhitiga jiddiy zarar yetkazishidan xavotirda.

Yevropa Komissiyasi vaziyatni diqqat bilan kuzatayotganini bildirgan va Albaniyaning strategik sarmoyalar to‘g‘risidagi qonuni qayta-qayta uzaytirilishi atrof-muhitga ta’sir xavfini oshirishini ta’kidlagan. Komissiya loyihada Yevropa Ittifoqi standartlariga to‘liq rioya qilinishi zarurligini uqtirgan.

Mahalliy ekolog Besjana Shehu bu nafaqat to‘siq yoki qurilish maydonchasi haqidagi bahs, balki qarorlarning shaffofligi va tabiatni muhofaza qilish masalasi ekanini aytgan. “Xavf ostida 18 ming gektardan ortiq muhim tabiiy yo‘lakning ekologik yaxlitligi turibdi”, deydi u.

Source: www.dw.com