Shimoliy Koreya rahbari Kim Chen In yadroviy bombalar uchun yoqilg'i ishlab chiqaradigan yangi zavodni ochdi va mamlakatning atom arsenali "eksponensial" kengaytirilishini talab qildi. Bu haqda davlat axborot agentligi KCNA xabar berdi.

Kim Chen In payshanba kuni zavodga tashrif buyurganida, qurol-yarog' uchun yadroviy material ishlab chiqarish quvvati besh yil oldingi darajadan ikki baravar ko'payganini aytdi. U kuchayib borayotgan xavfsizlik tahdidlari va "eng yovuz dushmanlar" bilan uzoq muddatli qarama-qarshilik tufayli kengayish zarurligini ta'kidladi.

KCNA ma'lumotlariga ko'ra, Kimga yangi ishlab chiqarish jarayonlari va ilg'or texnologiyalar haqida ma'lumot berilgan. Shuningdek, u hozirgi ishlab chiqarish maqsadlari va kelajak rejalarini ko'rib chiqqan. KCNA e'lon qilgan fotosuratlarda Kim kumush naychalar va quvurlar bilan o'ralgan tor yo'laklardan o'tayotgani aks etgan.

Xuddi shu kuni yadroviy kuchlarni oshirish bo'yicha muhim maslahat yig'ilishi bo'lib o'tdi. KCNA xabariga ko'ra, Kim "davlatimizning yadroviy kuchlarini eksponensial sur'atda kuchaytirishga qaratilgan ulkan kelajak rejasi"ni amalga oshirish ketma-ketligi va kafolatlarini belgilab bergan.

Tahlilchilarning fikricha, Kimning tashrifi, ayniqsa AQSh bilan diplomatik aloqalar oldidan, mamlakatning yadroviy qurolsizlanishi mumkin emasligini ko'rsatishga qaratilgan. NK News asoschisi Chad O'Carrollning ta'kidlashicha, bu tashrif Xitoy rahbari Si Szinpinning Pxenyanga bo'lajak tashrifi bilan bog'liq bo'lishi mumkin.

Source: www.aljazeera.com