NASA Italiyalik astronavt Luka Parmitanoni Artemis III missiyasining bosh uchuvchisi etib tayinladi. Bu Yevropa Ittifoqi vakilining AQSh kosmik agentligining asosiy inson parvozlari dasturidagi ilk ishtiroki hisoblanadi.

NASA rahbari Jared Isaakman seshanba kuni 2027 yilga mo‘ljallangan parvoz ekipajini e’lon qildi. To‘rt kishilik asosiy ekipaj va zaxira a’zosi Oyga qo‘nish uchun mo‘ljallangan yangi qurilmalarni sinovdan o‘tkazadi. Sinovlar dastlab rejalashtirilganidek Oy yuzasida emas, balki Yer orbitasida o‘tkaziladi.

Missiya qo‘mondoni NASA astronavti Rendi Bresnik, missiya mutaxassislari sifatida Andre Duglas va Frank Rubio tayinlangan. Uch nafar amerikalik astronavt va Yevropa kosmik agentligi (ESA) vakili Parmitano Orion kapsulasini ikkita Oy qo‘nish moduli bilan bog‘lash amaliyotini bajaradi.

NASA ushbu sinovlarni murakkab va Artemis IV missiyasi uchun muhim deb baholamoqda. Artemis IV 2028 yilda Oyning janubiy qutbiga birinchi ekipajli missiya sifatida rejalashtirilgan. Zaxira ekipaj a’zosi sifatida NASA astronavti Bob Xayns tayinlangan.

Artemis III missiyasi ikki oy oldin muvaffaqiyatli yakunlangan Artemis II missiyasidan so‘ng amalga oshirilmoqda. Aprel oyidagi parvoz 1970 yildagi Apollon 13 missiyasining masofa rekordini yangiladi. NASA rahbari Isaakman bu yutuqni “insoniyatning Oyga qaytishidagi jasur qadam” deb atadi.

49 yoshli Parmitano 2009 yilda ESA tomonidan astronavt etib tanlangan. U Xalqaro kosmik stansiyada (XKS) ikki marta bo‘lgan va murakkab kosmik yurishlarni amalga oshirgan. 2013 yildagi kosmik yurishda uning dubulg‘asi suv bilan to‘lib, hayotiga xavf tug‘ilgan edi. Shuningdek, u koinotdan birinchi DJ setini ijro etgan.

Parmitanoning Artemis III ekipajiga qo‘shilishi Italiya uchun katta yutuq sifatida baholanmoqda. Italiya kosmik agentligi prezidenti Teodoro Valente bu tanlov “Yevropa va Italiya kosmik tizimining koinotni o‘rganishdagi rolini tasdiqlaydi” dedi.

Source: www.dw.com