Ispaniyaning sobiq bosh vaziri Xose Luis Rodriges Sapatero seyfida topilgan hashamatli soat va zargarlik buyumlari tufayli yangi tergovga duch keldi.

2004-2011 yillarda hukumatni boshqargan va hukmron sotsialistik partiyada nufuzli bo‘lgan Sapatero avvalroq 2021 yilda Ispaniyaning Plus Ultra aviakompaniyasini davlat tomonidan qutqarish bilan bog‘liq ta’sir o‘tkazishda ayblanib, tergov qilinayotgan edi.

O‘tgan oy uning ofisiga reyd o‘tkazilgan va ispan ommaviy axborot vositalariga ko‘ra, 1,2 million yevro (1,02 million funt sterling) qiymatidagi marjon, bilaguzuk, uzuk va sirg‘alar topilgan.

Sapateroning matbuot kotibi Luis Arroyo, u zargarlik buyumlari bo‘yicha sudya oldida tushuntirish berishini aytdi. Taqinchoqlar oltin, yoqut va zumraddan yasalgan bo‘lib, asli Zambiya yoki Tailanddan kelgan.

Tergovchilar Sapatero ushbu zargarlik buyumlari uchun bojxona to‘lovlarini to‘laganligini isbotlay olmaganlikda gumon qilmoqda. Endi u soliq firibgarligi va kontrabandada ayblanmoqda.

Sobiq bosh vazirning yaqinlari bu buyumlar oilaviy meros bilan bog‘liqligini aytishgan. U shu oy oxirida sudda guvohlik berish uchun chaqirilgan.

Ispaniyada boshqa bosh vazirlar korrupsiya ishlari bo‘yicha guvohlik berishga chaqirilgan bo‘lsa-da, sobiq bosh vazir rasman tergovga tortilishi mamlakatning so‘nggi tarixida birinchi marta ro‘y bermoqda.

Bu tergov hozirgi bosh vazir Pedro Sanchesning Sotsialistik partiyasiga yangi zarba bo‘lib, Sapatero Sanchesning yaqin ittifoqchisi hisoblanadi. Plus Ultra ishida Sapatero 2021 yilda aviakompaniyaga 53 million yevrolik davlat yordamini olishda ta’sir o‘tkazganlikda va evaziga komissiya olganlikda ayblanmoqda. U ayblovlarni rad etadi.

O‘tgan oy politsiya Sotsialistik partiyaning Madriddagi shtab-kvartirasiga reyd o‘tkazib, korrupsiya tergovi doirasida hujjatlarni musodara qilgan. Sanchesning rafiqasi va ukasi ham ayblovlarga duch kelgan, ular ham aybni rad etadi.

Source: www.bbc.com