AQShning Kolorado va Yuta shtatlari chegarasida davom etayotgan yirik o‘rmon yong‘inlari natijasida uch nafar o‘t o‘chiruvchi halok bo‘ldi, ikki nafari jarohatlandi. Bu haqda mahalliy rasmiylar ma’lum qildi.

Halok bo‘lgan o‘t o‘chiruvchilar federal javob guruhi tarkibida Knowles va Gore yong‘inlariga qarshi kurashayotgan edi. Ular to‘satdan alanga ichida qolib, qochishga uringan, biroq muvaffaqiyatsizlikka uchragan. AQSH Ichki ishlar departamenti ma’lumotlariga ko‘ra, ikki jarohatlangan o‘t o‘chiruvchi kuyish jarohatlari bilan kasalxonaga yotqizilgan.

AQSH Yovvoyi tabiat yong‘inlari xizmati (US Wildland Fire Service) o‘t o‘chiruvchilarning ismlarini hozircha oshkor etmagan. Tashkilot “bizning asosiy e’tiborimiz ularning oilalari, do‘stlari va jamoadoshlarini qo‘llab-quvvatlashga qaratilgan” deya bildirdi.

Knowles va Gore yong‘inlari birlashib, Snyder Mesa yong‘iniga aylangan. Kolorado gubernatori Jared Polisning idorasiga ko‘ra, shanba kuni bu yong‘in 28 ming akr maydonni qamrab olgan. Gubernator Polis favqulodda holat e’lon qilib, shtat Milliy gvardiyasini yong‘inlarga qarshi kurashga jalb qildi.

“Men G‘arbiy Koloradoda xizmat vazifasini bajarayotganda halok bo‘lgan uch qahramon o‘t o‘chiruvchining yo‘qolishidan vayron bo‘ldim”, dedi Polis. “Yo‘qotilganlarning yaqinlari va hali ham alanga bilan kurashayotgan jamoa a’zolariga bilingki, Kolorado shtati siz bilan birga motam tutadi”.

Yuta shtatidagi eng yirik yong‘in – Cottonwood yong‘ini 93 ming akrdan ortiq maydonni qamrab olgan va hali ham nazorat ostiga olinmagan. Gubernator Spenser Koks 4 iyul bayrami arafasida pirotexnika vositalaridan foydalanishni taqiqlovchi favqulodda buyruq chiqardi.

Olimlar iqlim o‘zgarishi issiqlik va qurg‘oqchilik kabi yong‘inlarga olib keladigan ob-havo sharoitlarini yanada kuchaytirayotganini ta’kidlamoqda. Ular kelajakda yong‘inlar tez-tez va shiddatli bo‘lishini bashorat qilmoqda.

Source: www.bbc.co.uk