Pokistonning sharqiy qismidagi Lohur shahrida joylashgan repetitorlik markazining tomi qulab, kamida 14 nafar maktab o‘quvchisi halok bo‘ldi. Rasmiylarning ma'lum qilishicha, yana bir o‘qituvchi va sakkiz nafar bola jarohatlanib, shifoxonaga yotqizilgan.

Politsiya ma'lumotlariga ko‘ra, markaz egasi va yana bir shaxs hibsga olingan. Tibbiy manbalar halok bo‘lgan bolalarning yoshi taxminan 4 yoshdan 12 yoshgacha ekanligini ma'lum qildi.

Yuqori martabali politsiya xodimi Faysal Kamronning aytishicha, qutqaruvchilar vayronalar ostida qolgan bolalar borligi haqidagi xabarlardan so‘ng qidiruv ishlarini olib bormoqda. U markaz eski binoda joylashganini va ikkinchi qavatning tugallanmagan tomi sifatsiz qurilish tufayli qulaganini ta'kidladi.

Guvohlarning aytishicha, ishchilar binoda plitkalarni ta'mirlayotgan paytda tom qulab, bolalar ustiga tushgan. Geo News telekanali qutqaruvchilar va fuqarolarning belkurak va qo‘llari bilan vayronalarni kavlagani aks etgan tasvirlarni namoyish etdi.

Pokiston Bosh vaziri Shahboz Sharif “Lohurning Kahna hududidagi repetitorlik markazi tomining qulashida qimmatbaho hayotlarning yo‘qolishidan qayg‘u bildirib”, jarohatlanganlarning tez sog‘ayishi uchun duo qildi va hokimiyat organlariga ularga har tomonlama tibbiy yordam ko‘rsatishni topshirdi.

Sharif, shuningdek, “voqea uchun mas'ul shaxslar shaffof, xolis va zudlik bilan o‘tkazilgan tergov orqali aniqlanishi”ni ta'kidladi. Tom va binolarning qulashi Pokistonda keng tarqalgan bo‘lib, asosan xavfsizlik standartlarining pastligi va sifatsiz qurilish materiallari bilan bog‘liq.

O‘tgan yilning iyul oyida Karachining janubiy qismidagi Layari tumanida besh qavatli bino qulashi natijasida 27 kishi halok bo‘lgan va 10 kishi jarohatlangan edi.

Source: www.aljazeera.com