Germaniya federal prokuraturasi 2022-yilda Boltiq dengizidagi “Shimoliy oqim” gaz quvurlarining portlatilishi ortida Ukraina davlat organlari turganini ma’lum qildi. Prokuratura 50 yoshli ukrainalik Serhii K. va uning olti sherigiga nisbatan ayblov e’lon qildi.

Prokurorlarning so‘zlariga ko‘ra, Serhii K. o‘sha paytda Ukraina armiyasi ofitseri bo‘lgan va uning sheriklari ham harbiy xizmatchilar edi. Ular “Shimoliy oqim 1” va “Shimoliy oqim 2” quvurlarini vayron qilish rejasini tuzgan, maqsad esa Rossiyaning gaz savdosidan oladigan daromadini to‘xtatish edi.

Portlatish 2022-yil 26-sentabrda Daniyaning Bornxolm oroli yaqinida sodir bo‘lgan. Gumonlanuvchilar Ukrainadan soxta pasportlar bilan Germaniyaga kelib, Rostok shahridan “Andromeda” yaxtasini ijaraga olgan. Keyinroq yaxtada harbiy portlovchi moddalar izlari topilgan.

Germaniya Ukrainaning eng yirik harbiy homiylaridan biri bo‘lib, bu voqea ikki davlat o‘rtasida diplomatik noqulaylik tug‘dirishi mumkin. Serhii K. 2025-yil avgustida Italiyada hibsga olinib, Germaniyaga ekstraditsiya qilingan. U ayblovlarni rad etadi va advokati mijozining oqlanishiga ishonch bildirgan.

Source: www.dw.com