Kanadalik tadqiqot guruhi Citizen Lab tomonidan e'lon qilingan hisobotga ko'ra, Yevropa Parlamentining sobiq a'zosi Stelios Kouloglouning iPhone’i 2022 va 2023 yillarda kamida uch marta Pegasus josuslik dasturi bilan zararlangan.

Kouloglou 2015 yildan 2024 yilgacha Yevroparlament deputati bo‘lib ishlagan va PEGA qo‘mitasi tarkibida bo‘lgan. Ushbu qo‘mita Yevropa Ittifoqida Pegasus va boshqa josuslik vositalaridan noqonuniy foydalanishni tekshirish uchun tuzilgan edi.

Hujumlar Afina va Bryusselda sodir bo‘lgan. Citizen Lab ma'lumotlariga ko‘ra, Kouloglou Apple’dan xabarnomalar olgan, ammo ular hujumlardan bir necha oy o‘tib kelgan.

Hisobotda ta'kidlanishicha, bu hodisa “tijoriy josuslik dasturlari demokratik jarayonlarga jiddiy tahdid solishini” ko‘rsatadi. Hujumlar natijasida PEGA qo‘mitasi a'zolarining maxfiy muloqotlari va tergov ostidagi tomonlar haqidagi ma'lumotlar oshkor bo‘lishi mumkin edi.

Citizen Lab hujumni ma'lum bir hukumatga bog‘lamagan, ammo Gretsiya hukumatining aloqadorligi haqida hech qanday dalil topilmagan. Pegasus Isroilning NSO Group kompaniyasi tomonidan ishlab chiqilgan bo‘lib, u qonuniy vosita sifatida sotiladi, ammo jurnalistlar va faollarni kuzatishda ham ishlatilgan.

NSO Group AQSh tomonidan qora ro‘yxatga kiritilgan va WhatsApp’ni nishonga olish taqiqlangan. Yevropa Komissiyasi va NSO Group izoh berishdan bosh tortgan. Demokratiya va Texnologiya Markazi direktori Rand Hammoud bu holat “Yevropadagi demokratiya, asosiy huquqlar va qonun ustuvorligiga tahdid” ekanligini aytgan.

Source: www.aljazeera.com