AQShning Ogayo shtatida yuz bergan yo‘l-transport hodisasida 21 yoshli universitet futbol jamoasi darvozaboni halok bo‘ldi. Hodisa 42 yoshli o‘zbekistonlik Behzod Asrarov boshqargan yuk mashinasining yengil avtomobilga urilishi natijasida sodir bo‘ldi.

Fox News ma’lumotlariga ko‘ra, Asrarov AQShga Diversity Visa lotereyasi dasturi orqali kelgan va I-71 trassasida harakatlanayotganida to‘qnashuv sodir etgan. Halok bo‘lgan Tobias Forsayt Massachusets universiteti (Louell) darvozaboni edi.

OAV xabariga ko‘ra, voqea joyiga yetib kelgan yo‘l politsiyasi xodimlariga Asrarov videoregistratorni yirtib tashlashga, uchta mobil telefon va ma’lumotlarni qayd qilish qurilmasini yo‘q qilishga uringan. Ingliz tilini bilmagani uchun politsiyachilar bilan Google Translate orqali muloqot qilgani aytilmoqda.

Asrarov Ogayo shtatida berilgan tijoriy haydovchilik guvohnomasiga (CDL) ega bo‘lgan. Hozirda litsenziya olish shartlari va talablarga rioya qilinganligi tekshirilmoqda.

AQSh transport vaziri Shon Daffi hodisadan so‘ng yo‘l belgilarini o‘qiy olmaydigan va huquq-tartibot xodimlari bilan muloqot qila olmaydigan haydovchilarni yuk mashinalarini boshqarishga qo‘ymaslik kerakligini ta’kidladi.

Massachusets universitetida Forsaytning o‘limi og‘ir yo‘qotish deb baholandi. Sport departamenti direktori Linn Kaoutts yosh darvozabon jamoaning sevimli a’zosi sifatida abadiy xotirada qolishini aytdi.

Tekshiruv davom etmoqda. Eslatib o‘tamiz, avvalroq O‘zbekiston fuqarolari USA Farm Labor tashkiloti bilan birgalikdagi dastur doirasida AQSh fermalarida qonuniy ishlash imkoniyatiga ega bo‘lishi haqida xabar berilgan edi.

Source: podrobno.uz