Xitoyning janubiy qismida Maysak tropik bo'roni sababli yuzaga kelgan suv toshqinlari natijasida kamida 39 kishi hayotdan ko'z yumdi. Aksariyat qurbonlar Nanning shahridagi to'g'onning yorilishi tufayli halok bo'lgan.

Shahar vitse-meri Ding Vey payshanba kuni matbuot anjumanida qurbonlar sonini e'lon qildi. Avvalroq olti kishi halok bo'lgani xabar qilingan edi, biroq rekord darajadagi yog'ingarchilik suv omborlarini to'ldirib, Guangxi mintaqasidagi shahar va qishloqlarni suv ostida qoldirdi.

Nanningdagi to'g'on yorilishi oqibatida 26 kishi halok bo'lgani aytilmoqda. Mintaqadan 130 mingga yaqin odam evakuatsiya qilingan, suv ostida qolgan hududlarda qutqaruv ishlari uchun dronlar va minglab qayiqlar jalb etilgan.

Guangxi janubida bir necha kun davomida kuchli yomg'ir yog'di. Ba'zi hududlarda jami yog'ingarchilik miqdori 10-40 sm, eng og'ir joylarda esa 90 sm dan oshgan. Milliy meteorologiya markazi ma'lumotlariga ko'ra, bu ko'rsatkichlar rekord darajaga yetgan.

Qutqaruv operatsiyasiga 8 mingdan ortiq odam va 5 ming 700 ga yaqin qayiq jalb qilingan. Qutqaruvchilar kuchli oqim va qoldiqlarga qarshi kurashib, jabrlanganlarga yetib borishga harakat qilmoqda.

Vitse-mer Ding Veyning so'zlariga ko'ra, suvlar pasaymoqda, biroq keyingi ikki kun ichida ba'zi hududlarda yana yomg'ir kutilmoqda. Tozalash va dezinfeksiya ishlari olib borilmoqda, yo'llar ta'mirlanmoqda va 60 mingdan ortiq uyga elektr energiyasi qayta ulangan.

Guangxi provinsiyasidagi Guigang hayvonot bog'ida suv toshqini tufayli to'siqlar buzilib, kamida 100 hayvon, jumladan alpaka, mitti cho'chqalar va zebralar qochib ketgan. Bog' jamoatchilikdan yordam so'rab murojaat qilgan.

Mahalliy madaniyat, sport va turizm byurosi bayonotiga ko'ra, yo'qolgan hayvonlar orasida ikki Shimoliy Amerika yenoti, to'rtta kirpi va o'ttizta tovus bor. Bog' hayvonlarning qo'rqinchli va tajovuzkor bo'lishi mumkinligi haqida ogohlantirgan.

Source: www.aljazeera.com