Suriya ichki ishlar vaziri Anas Xattob payshanba kuni Damashqda ikki kun oldin sodir etilgan “terroristik portlashlar” uchun mas’ul bo‘lgan guruh qo‘lga olinganini ma’lum qildi. Bu haqda SANA davlat axborot agentligi xabar berdi.

Vazirning so‘zlariga ko‘ra, gumonlanuvchilar Damashq va uning atrofidagi to‘rt mahallada bir vaqtning o‘zida o‘tkazilgan reydlar chog‘ida ushlangan. Tergov yakunlangach, ularning shaxsi, roli va aloqalari oshkor etiladi.

Portlashlar seshanba kuni Fransiya prezidenti Emmanuel Makronning shaharga tashrifi chog‘ida sodir bo‘ldi. Ikkala bomba ham “Four Seasons” mehmonxonasi yaqinida joylashtirilgan bo‘lib, Makron o‘sha yerda tunagan edi.

Ichki ishlar vazirligining ma’lumotiga ko‘ra, bir qurilma to‘xtab turgan mashinaga, ikkinchisi esa axlat qutisiga yashirilgan. Mutaxassislar ularni zararsizlantirishga urinayotganda portlash sodir bo‘lgan.

Portlashlardan so‘ng Suriya prezidenti Ahmad ash-Sharaa bilan birga chiqish qilgan Makron: “Biz yaradorlar bilan birga turishimiz, xavfsizlik borasida murosasiz bo‘lishimiz, ammo beqarorlikka yo‘l qo‘ymasligimiz kerak”, dedi.

Hujumda 36 kishi yaralandi. Bu voqea Bashar al-Assad 2024-yil dekabrida ag‘darilganidan keyin Yevropa Ittifoqi davlati rahbarining Suriyaga birinchi tashrifiga soya soldi.

O‘tgan hafta Damashq markazidagi gavjum kafeda sodir etilgan boshqa portlashda 9 kishi halok bo‘lgan edi. Hech bir guruh javobgarlikni o‘z zimmasiga olmagan, biroq Damashq gubernatori Mahir Marvon “yomon niyatli kuchlar” mamlakatni beqarorlashtirishga urinayotganini aytdi.

Source: www.aljazeera.com