Fransiyaning mustaqil marketing va sotsiologik tadqiqotlar instituti bir qator fransuz ommaviy axborot vositalari buyurtmasiga ko‘ra, 2027 yilgi prezidentlik saylovlari arafasida saylovchilarning afzalliklari bo‘yicha so‘rovnoma o‘tkazdi. Olingan ma’lumotlarga ko‘ra, agar ovoz berish yaqin yakshanba kuni, 12 iyulda bo‘lib o‘tganida, birinchi tur yakunlariga ko‘ra “Milliy birlashma” partiyasi rahbari Marin Le Pen birinchi o‘rinni egallagan bo‘lar edi.

“Ushbu so‘rovnomaning birinchi xulosasi juda aniq: “Milliy front”ning Yevroparlament deputatlari yordamchilari ishidagi davlat mablag‘larini o‘zlashtirish bo‘yicha apellyatsiya hukmi va o‘z nomzodini rasman e’lon qilganidan so‘ng, Marin Le Pen birinchi tur yakunlariga ko‘ra 34% dan 36% gacha ovoz to‘plab, ishonchli tarzda birinchi o‘rinni egallagan bo‘lar edi”, — deb yozadi BFMTV telekanali.

“Uning hukm qilinishining hech qanday salbiy ta’siri kuzatilmadi. Aksincha, nomzodlikni e’lon qilishi ijobiy rol o‘ynadi. Asosiy voqea hukm emas, balki nomzodlikni e’lon qilish bo‘ldi”, — dedi OpinionWay tadqiqot kompaniyasi raisi o‘rinbosari Bryuno Janbar Les Échos gazetasiga bergan izohida.

Tadqiqot natijalariga ko‘ra, ikkinchi o‘rinni markazchi o‘ng partiya “Ufqlar” rahbari, Fransiyaning sobiq bosh vaziri va Gavr meri Eduar Filipp egallashi mumkin. Ayni paytda ikkinchi turga chiqish uchun bir necha nomzod jiddiy da’vogarlik qilmoqda: Eduar Filipp, prezidentlik partiyasi “Uyg‘onish” rahbari Gabriel Attal va o‘ta chap “Bo‘ysunmagan Fransiya” partiyasi asoschisi Jan-Lyuk Melanson.

So‘rovnomaga ko‘ra, Eduar Filipp birinchi turda markazchi lagerdan yagona nomzod bo‘lsa, 22% ovozga ishonishi mumkin, ya’ni boshqa sobiq bosh vazir Gabriel Attal saylovda qatnashmasa. Agar ikkalasi ham poygada qatnashsa, Filipp (18%) Attaldan (7%) sezilarli darajada oldinda. Biroq, agar Attal markazning yagona vakili bo‘lsa, u 16% ovoz to‘plab, Melansondan biroz oldinda ikkinchi turga chiqishi mumkin.

Jan-Lyuk Melanson 13% dan 15% gacha ovoz to‘plamoqda, bu tadqiqotchilarning fikricha, markazchi lagerdan bir yoki bir necha nomzod qatnashishidan qat’i nazar, ikkinchi turga chiqish uchun yetarli emas.

Fransiya hukumati iyul oyi boshida e’lon qilganidek, 2027 yilgi prezidentlik saylovlarining birinchi turi 18 aprel yakshanba kuni, ikkinchi turi esa 2 may yakshanba kuni bo‘lib o‘tadi. Ovoz berish Emmanuel Makronning 14 mayda tugaydigan ikkinchi prezidentlik muddati tugashiga 12 kun qolganida yakunlanadi.

Source: kun.uz