AQSh prezidenti Donald Tramp ma'muriyati The New York Times gazetasining kamida to‘rt nafar jurnalistiga chaqiruv qog‘ozi (subpoena) yubordi. Bu harakat matbuot erkinligiga hujum sifatida baholanmoqda.

Jurnalistlardan 9-iyul kuni Manxettendagi katta hakamlar hay’ati oldida guvohlik berish talab qilingan. Ba’zi chaqiruv qog‘ozlari federal agentlar tomonidan jurnalistlarning uylariga yetkazilgan.

Gazeta advokati Devid MakKrouning so‘zlariga ko‘ra, “federal huquq-tartibot xodimlarining gazeta muxbirlari eshigida paydo bo‘lishi Konstitutsiya va matbuot erkinligiga ishonadigan har qanday amerikalikni hayratda qoldirishi kerak”.

Jurnalistlarni himoya qilish qo‘mitasi (CPJ) bu chaqiruvlarni zudlik bilan bekor qilishni talab qildi. CPJ rahbari Jodi Ginsbergning ta’kidlashicha, bu “Trampning mustaqil axborot tashkilotlariga tahdid qilish va qo‘rqitish harakatlarida favqulodda keskinlashuv”dir.

Chaqiruv qog‘ozlari Adliya vazirligining yuqori martabali amaldori, Nyu-York janubiy okrugi prokurori Jey Kleyton tomonidan ruxsat etilgan. Ayni paytda Kleyton milliy razvedka direktori lavozimiga nomzod qilib ko‘rsatilgan.

Bahs mavzusi – Trampning 2026-yilgi NATO sammitidan qaytish parvozidir. The New York Times maxfiy manbalarga tayanib, prezidentning yangi “Air Force One” samolyoti xavfsizlik talablariga javob bermagani uchun eski samolyotda qaytgani haqida xabar bergan.

Bu voqea Tramp ma'muriyati va ommaviy axborot vositalari o‘rtasidagi navbatdagi to‘qnashuvdir. Tramp ilgari The New York Times’ni 15 milliard dollarlik tuhmat da’vosi bilan sudga bergan, biroq da’vo rad etilgan edi.

Demokratlar yetakchisi Chak Shumer bu harakatni “federal huquq-tartibot resurslaridan jirkanch foydalanish” deb atadi va barcha amerikaliklarni xavotirga chaqirdi.

Source: www.aljazeera.com