Bagama orollarida yuz bergan samolyot halokati oqibatida 9 yo‘lovchi va uchuvchi halok bo‘ldi, deb xabar berdi rasmiylar.

Flamingo Air kompaniyasiga tegishli Cessna 402 samolyoti poytaxt Nassau yaqinidagi Lynden Pindling xalqaro aeroportidan San Andros aeroportiga qisqa parvozni amalga oshirayotgan edi. Samolyot qo‘nish oldidan “qiyinchiliklarga duch kelgan” va butazorlarga qulagan, deyiladi mamlakat Aviatsiya hodisalarini tergov qilish organi bayonotida.

Halokat Bagama orollarining 53-mustaqillik yilligi kuni sodir bo‘ldi. Bosh vazir Filipp Devis matbuot anjumanida: “Bugun bayram kuni edi, ammo motam kuniga aylandi. Millatimiz tarixida yana bir bob fojiaga aylandi”, dedi.

Devis dastlab bir kishi tirik qolganini aytgan bo‘lsa, keyinroq uning jarohatlardan vafot etganini tasdiqladi. Bortdagilarning yoshi va ismlari haqida ma’lumot berilmagan.

Aviatsiya vazirligi Flamingo Air kompaniyasining havo kemasi sertifikatini “ehtiyot chorasi sifatida” vaqtincha to‘xtatdi. Vazirlik bu “salbiy chora emas”, deb ta’kidladi. Shuningdek, juma kuni ikkita “xavfsizlik hodisasi” sodir bo‘lgani qayd etildi.

Aviatsiya vaziri JoBet Koulbi-Devisning so‘zlariga ko‘ra, avvalroq boshqa samolyot uchuvchi muammo haqida xabar berganidan keyin Nassauga qaytgan. Qo‘nganidan so‘ng bortda yong‘in chiqqan, yo‘lovchilar tushirilgan. Flamingo Air kompaniyasi tergov bilan hamkorlik qilishga va’da berdi.

Source: www.bbc.co.uk