Gretsiyaning Saloniki shahridan Germaniyaning Memmingen shahriga uchayotgan Ryanair aviakompaniyasining samolyotida favqulodda hodisa yuz berdi. 61 yoshli Lyubisa Karovich ismli yo‘lovchi samolyot oynasi sinib ketishi natijasida deyarli to‘liq tashqariga so‘rilib ketayozdi.

Uning rafiqasi Svetlana Grkovichning so‘zlariga ko‘ra, erining tanasining yarmi samolyot tashqarisida bo‘lgan. Grkovich erining oyoqlaridan ushlab, ikki yo‘lovchi bilan birgalikda uni ichkariga tortib olishgan. Karovich bu vaqtda uch marta hushini yo‘qotgan.

Hodisa samolyot havoga ko‘tarilganidan 10 daqiqa o‘tib sodir bo‘lgan. Samolyot to‘satdan 9000 fut (2700 metr) pastga tushgan. Yo‘lovchilarning aytishicha, portlash ovoziga o‘xshash tovush eshitilgan va kislorod maskalari tushib ketgan.

Grkovichning aytishicha, erining qo‘li jiddiy shikastlangan va kuyishlar bor. U hali ham shifoxonada davolanmoqda va voqeani eslay olmaydi. Grkovichning o‘zi ham ruhiy jihatdan og‘ir ahvolda.

Ryanair aviakompaniyasi voqeani tasdiqlab, samolyot Salonikiga qaytganini va bir yo‘lovchiga tibbiy yordam ko‘rsatilganini ma’lum qildi. Hodisa yuzasidan Gretsiya havo va temir yo‘l xavfsizligi tekshiruv organi tomonidan tergov boshlangan.

Samolyot 18 yillik Boeing 737-800 bo‘lib, Malta Air kompaniyasiga tegishli. Tergovda Boeing, AQSh Federal Aviatsiya Boshqarmasi va Yevropa Ittifoqi Aviatsiya Xavfsizligi Agentligi mutaxassislari ishtirok etmoqda.

Source: www.bbc.co.uk