AQSh prezidenti Donald Tramp Hormuz bo‘g‘ozidan o‘tuvchi kemalar uchun 20 foizlik tranzit to‘lovi joriy etilishi haqidagi bayonotidan qaytdi. Ushbu to‘lov bir kun avval e’lon qilingan edi.

Tramp o‘zining Truth Social tarmog‘idagi avvalgi xabarida bu to‘lovni “dunyoning ushbu o‘ta beqaror qismida xavfsizlikni ta’minlash xarajatlari uchun kompensatsiya” deb atagan edi. Biroq ma’muriyat xalqaro suv yo‘lida xavfsiz o‘tishni qanday ta’minlashi haqida tafsilot bermagan.

Yangi bayonotda Tramp to‘lov o‘rniga “Fors ko‘rfazi davlatlari bilan savdo va investitsiya bitimlari” tuzilishini ma’lum qildi. U qaror “Yaqin Sharq rahbarlari bilan samarali muzokaralar”dan so‘ng qabul qilinganini ta’kidladi.

Tramp ko‘rfaz davlatlarining sarmoyalari “ulkan” bo‘lishiga va’da berdi, ammo tafsilot bermadi. AQSh va Isroil 28 fevralda Eronga qarshi urush boshlashdan oldin ham bir qancha mintaqa davlatlari AQShga ko‘p milliard dollarlik sarmoya kiritishga va’da bergan edi.

Tramp avvalroq Hormuz bo‘g‘ozini “nazorat qilish” va undan o‘tish uchun to‘lov undirish mumkinligini aytgan bo‘lsa, dushanba kungi e’lon bu retorikaning siyosatga aylanishiga eng yaqin belgi edi. Biroq seshanba kuni u jurnalistlarga “to‘lov konsepsiyasini yoqtirmasligini” aytdi.

AQSh davlat kotibi Marko Rubio ilgari xalqaro suv yo‘lida har qanday to‘lov undirish xalqaro huquqni buzishi haqida bayonot bergan edi. Trampning so‘nggi pozitsiyasi bu nuqtai nazarga qaytishni anglatadi.

AQSh harbiy blokadasi iyun oyi o‘rtalarida imzolangan o‘zaro anglashuv memorandumi doirasida to‘xtatilgan edi. Biroq so‘nggi hujumlar tufayli bu kelishuv xavf ostida qoldi. Eron ommaviy axborot vositalari Bushir, Bandar-Abbos, Mahshahr va Obodon shaharlarida, shuningdek, Kish va Qeshm orollarida portlashlar haqida xabar berdi.

Quvayt o‘z havo hududida noma’lum nishonlarga qarshi jangovar harakatlar olib borayotganini ma’lum qildi. Eron mintaqadagi AQSh ob’ektlariga hujumlarni davom ettirishga va’da bergan.

Source: www.aljazeera.com