Yevropa Ittifoqida (YI) 1-yanvardan kuchga kirgan yangi qoidalarga ko‘ra, yirik kompaniyalar sotilmagan kiyim, aksessuar va poyafzallarni yo‘q qilishlari mumkin emas. Bu chora chiqindilarni kamaytirish maqsadida qabul qilindi.

Har yili YI davlatlarida yuz minglab tonna moda mahsulotlari shikastlanish, eski zaxiralar va qaytarilgan onlayn buyurtmalar tufayli yo‘q qilinadi. Yangi qoida 250 dan ortiq xodimi va yillik aylanmasi 50 million yevrodan oshadigan yirik chakana sotuvchilar, ulgurji sotuvchilar va ishlab chiqaruvchilarga taalluqli.

Endilikda kompaniyalar sotilmagan mahsulotlarni chegirmalar, muqobil bozorlar va xayriya tashkilotlari orqali sotish yo‘llarini topishlari kerak. Faqat xavfli, shikastlangan, qalbaki yoki xayriya tashkilotlari rad etgan buyumlar yo‘q qilinishi mumkin.

Kompaniyalar har yili tashlab yuborilgan tovarlar haqida hisobot e’lon qilishlari va besh yil davomida yozuvlarni saqlashlari shart. Ushbu tartib 2030-yildan boshlab o‘rta kompaniyalarga ham joriy etiladi.

Yevropa Atrof-muhit Agentligi (EEA) ma’lumotlariga ko‘ra, har yili sotilmagan to‘qimachilik mahsulotlarining 4% dan 9% gacha yo‘q qilinadi. Onlayn xaridlar va qaytarishlarning tez o‘sishi bu chiqindilarni yanada ko‘paytirmoqda.

YI davlatlari moda sanoatida xomashyo, suv, energiya va transport chiqindilarini hisobga olish, qayta ishlash va qayta foydalanishni rag‘batlantirishga chaqirilmoqda. EEA bu choralar mato sanoatini barqaror qilishga yordam berishini ta’kidlaydi.

Germaniya Chakana Savdo Federatsiyasi (HDE) iste’molchilar chegirmali mahsulotlar ko‘payishidan foyda ko‘rishini aytdi. Biroq HDE rahbari Stefan Gent qoida o‘zgarishi ko‘plab do‘konlar uchun qiyin bo‘lishini, chunki barcha sotilmagan tovarlarni osongina qayta sotish yoki xayriya qilish mumkin emasligini ta’kidladi.

Source: www.dw.com