Nigeriyaning shimoliy-sharqidagi Borno shtatida vabo kasalligi jadal tarqalmoqda. Podrobno.uz maʼlumotlariga ko‘ra, kasallikdan kamida 198 kishi vafot etgan, umumiy gumon qilingan holatlar soni esa 35,5 mingdan oshgan.

Infeksiya may oyida boshlangan bo‘lib, 12-iyulga kelib “Chegara bilmaydigan shifokorlar” xalqaro tashkiloti vaboga chalingan 24 mingdan ortiq bemorga yordam ko‘rsatgan. Bemorlarning to‘rtdan bir qismi og‘ir ahvolda bo‘lgan. Epidemiyaga qarshi kurashda xalqaro hamjamiyat 2 ixtisoslashtirilgan markaz, 5 davolash bo‘limi va 17 og‘iz orqali regidratatsiya punktini qo‘llab-quvvatlamoqda.

Mutaxassislarning taʼkidlashicha, vabo tarqalish dinamikasi ko‘rilayotgan choralardan hali ham oldinda. Asosiy sabablar sifatida toza ichimlik suvining keskin tanqisligi, antisanitariya va mahalliy aholining sifatli tibbiy yordamga ega bo‘lish imkoniyatining cheklanganligi ko‘rsatilmoqda.

Vaziyat hukumat va xalqaro tashkilotlarning keng ko‘lamli harakatlariga qaramay yomonlashishda davom etmoqda. Iyun o‘rtalarida BMTning gumanitar masalalarni muvofiqlashtirish boshqarmasi 90 o‘lim va 12 ming kasallanish haqida xabar bergan bo‘lsa, hozirda bu ko‘rsatkichlar ikki barobarga oshgan. Iyul boshida hukumat huquq himoyachilari ko‘magida 2,6 milliondan ortiq kishini qamrab olgan emlash kampaniyasini o‘tkazgan edi.

Source: podrobno.uz