Belgiyaning Gent universiteti amerikalik akademik Natan Kofnasni ishdan vaqtincha to‘xtatdi. U Kembrij universitetining sobiq qora tanli professori Jeyson Ardayga nisbatan plagiat ayblovlarini ilgari surgan edi. Arday o‘tgan hafta 41 yoshida vafot etgan.

Universitet bayonotiga ko‘ra, Kofnasga nisbatan “dastlabki intizomiy tergov” boshlandi va u “ehtiyot chorasi sifatida” ishdan to‘xtatildi. Gent universiteti rahbariyati inson qadr-qimmati va diskriminatsiyaga qarshi kurash tamoyillariga tayanayotganini bildirdi.

Rektor Petra De Sutter va vitse-rektor Xervig Reynaertning qo‘shma bayonotida ta’kidlanishicha, akademik erkinlik muhim, ammo u cheksiz emas va boshqalarning huquqlarini himoya qilish uchun cheklanishi mumkin. Ular “bahsli qarashlar” ham muhokama qilinishi kerak, lekin mas’uliyat bilan yondashish zarur, degan fikrni bildirdi.

Eslatib o‘tamiz, Jeyson Arday 2023-yilda Kembrijning eng yosh qora tanli professori bo‘lgan. U avgust oyi boshida doktorlik dissertatsiyasida plagiat va shaxsiy yutuqlarini bo‘rttirib ko‘rsatganlikda ayblanib, ishdan ketgan edi. Arday bolaligida autizm tashxisi qo‘yilgan bo‘lib, barcha ayblovlarni rad etgan.

Ardayning o‘limi Britaniya va boshqa mamlakatlarda norozilik namoyishlariga sabab bo‘ldi. Ko‘plab odamlar uning o‘limida ommaviy axborot vositalaridagi shov-shuvli ayblovlar sababchi deb hisoblamoqda. Oksford akademigi Sneha Krishnan bu voqeani “tizimli irqchilik qurboni” deb atadi.

Gent universiteti hozircha Kofnasga nisbatan to‘liq intizomiy ish qo‘zg‘atish uchun asoslar yetarli yoki yo‘qligini o‘rganmoqda. Universitet bu masala bo‘yicha so‘nggi bayonotlarni “juda jiddiy” qabul qilayotganini ma’lum qildi.

Source: www.aljazeera.com