Xitoy hukumati AQSh dollaridagi aktivlarga bo'lgan qaramlikni bosqichma-bosqich kamaytirish hamda moliyaviy va geosiyosiy xatarlardan himoyalanish maqsadida o'zining oltin zaxiralarini kengaytirishda davom etmoqda. Tahlilchilarning ta'kidlashicha, mamlakat markaziy banki ketma-ket oylar davomida qimmatbaho metall xaridini amalga oshirib, o'z zaxiralarini diversifikatsiya qilishga intilmoqda.

Jahon oltin kengashi ma'lumotlariga ko'ra, sentyabr oyida Xitoy markaziy banki taxminan 23 tonna oltin sotib olib, o'zining rasmiy zaxiralarini 2410 tonna atrofida yetkazgan. Mutaxassislarning fikricha, bunday harakatlar G'arb davlatlari tomonidan Rossiya aktivlarining muzlatib qo'yilishi va AQShning rekord darajadagi davlat qarzi fonida yuzaga kelgan xavotirlar bilan bog'liq. Ichki hududda saqlanadigan oltin boshqa davlatlarning xohishiga bog'liq bo'lmagani sababli sanksiyalardan himoya vazifasini bajaradi.

Shu bilan birga, mamlakatdagi oddiy aholi va xususiy investorlar ham iqtisodiy noaniqliklar sababli o'z jamg'armalarini saqlab qolish uchun oltinga talabni keskin oshirgan. Xitoy oltin assotsiatsiyasi ma'lumotlariga ko'ra, joriy yilning birinchi yarmida quyma oltin va tangalar xaridi o'tgan yilning mos davriga nisbatan sezilarli darajada yuqori bo'lgan, chunki ko'chmas mulk bozori va fond birjalaridagi tanglik aholini muqobil aktivlar qidirishga majbur qilmoqda.

Garchi bu jarayon dollar hukmronligiga darhol chek qo'ymasada, mutaxassislar AQSh davlat qarz qog'ozlariga bo'lgan talabning bosqichma-bosqich pasayishiga olib kelishi mumkinligini taxmin qilmoqdalar. AQSh rejimining moliyaviy siyosati va ortib borayotgan qarz yuki global miqyosdagi rivojlanayotgan bozorlarni o'z zaxiralarini qayta ko'rib chiqishga majbur qilmoqda, bu esa kelgusida xalqaro moliya bozorida jiddiy o'zgarishlarga sabab bo'lishi mumkin.

Source: www.aljazeera.com