Falastinning ishg‘ol qilingan G‘arbiy Sohil hududida niqobli ko‘chmanchilar falastinliklarga qarshi navbatdagi zo‘ravonlik harakatlarini amalga oshirgani xabar qilinmoqda. Abu-Falah qishlog‘ida hosil yig‘ib yurgan mahalliy aholiga qarata kaltaklar va o‘qotar qurollar bilan qurollangan 80 nafarga yaqin niqobli shaxslar bostirib kirgan. Ma'lum bo‘lishicha, hududdagi zaytun hosili mahalliy iqtisodiyot uchun muhim manba hisoblanadi va noqonuniy posyolka aholisi tomonidan muntazam ravishda hujumlarga uchrab kelmoqda.

Voqea joyiga Isroil rejimining harbiy mashinalari yetib kelganiga qaramay, hujumlar to‘xtamagan va harbiylar falastinliklarga qarshi ko‘zdan yosh oqizuvchi gaz ishlatgan. Guvohlar va mustaqil jurnalistlarning so‘zlariga ko‘ra, avtomatlar bilan qurollangan qo‘shimcha ko‘chmanchilar yetib kelib, o‘q otishni boshlagan. Natijada hududda jiddiy tartibsizliklar kelib chiqqan va odamlar qochishga majbur bo‘lgan.

Ushbu to‘qnashuvlar chog‘ida xorijiy OAV vakillari ham jabr ko‘rgani aytilmoqda. Xususan, Washington Post nashri jurnalisti Haydi Levin hujumchilar tomonidan kaltaklanib, uning buyumlari talon-toroj qilingani da'vo qilinmoqda. Jurnalistning o‘zi himoya dubulg‘asi va nimchasi tufayligina o‘limdan qolganini bildirgan. G‘arbiy Sohildagi zo‘ravonliklar darajasi rekord darajaga yetgani, xalqaro tashkilotlar ma'lumotlariga ko‘ra, Isroil rejimi yerlarni musodara qilish va noqonuniy posyolkalarni kengaytirish siyosatini davom ettirayotgani ta'kidlanmoqda.

Source: www.aljazeera.com